Latest News

Agriculture Department hmalakna in Serchhip-ah Ran chaw herna khawl hawn a ni


Agriculture Department in Serchhip-a Ran chaw herna hmun an buatsaih, Mini Feed Mill chu nimin khan Agriculture Department Director Rohmingthanga Colney chuan a hawng a, helai hmunah hian nikum November thla atang khan Ran chaw siamchhuah ni tawhin December thla atang khan hralhchhuah a lo ni tawh a ni.

Serchhip Agriculture Complex-a Mini Feed Mill hawnna ah hian Agriculture Department Director Rohmingthanga Colney chuan tun thla tawp-a pension a chhuak mai tur a ni tih sawiin, chutiang kara hetiang khawl pawimawh hawnna hun remchang an buatsaih sak chu lawmawm a tih thu a sawi a. Tuna ran chaw herna khawl an hawn tak chu FOCUS leh RKVY-RAFTAAR hnuai hmalakna a ni tih sawiin, Scheme pakhat atanga hmalakna lian tak kalpui chu a harsat thin avangin Scheme hrang hrang pawhkhawm (convergence) chu a tul thin thu leh hei hi sawrkar pawhin ngai pawimawhin hetianga Serchhip DAO leh a thawhpui ten ruahmanna tha tak an lo siam chu lawmawm a tih thu a sawi a ni.

Nikum hmasa lamah SEDP atangin District hrang hrangah Vaimim chin a ni tih sawiin Agriculture Department Director chuan, nikum ah pawh chin a nih leh thu a sawi a, District hrang hrang zingah Serchhip District chu thildang a hman leh theih tura tharchhuak awmchhun a ni tih sawiin, hetianga thlai tharchhuah a hlutna tihpun hi FOCUS hmalakna pawhin a tum a ni tih a sawi a. Vaimim tharchhuah te leina tur ruahman a ni lo chunga Serchhip DAO leh a thawhpui ten remchang taka ruahmanna an siam te, ran chaw siamna atana an hmang te leh a hawnna neih a nih hma atanga tangkai taka hman a ni chu lawmawm a tih thu a sawi bawk.

Agriculture Department Director chuan Serchhip chu Tel-An chin ah a bultantu a lo ni tawh tih sawiin, hlawhtling taka bul an lo tan tawh chu District dangah pawh tih chhunzawm a nih dawn thu leh Tel-a intodelh tura hmalak tum a ni tih a sawi a. Serchhip District-ah Dal pawh tharchhuah a ni tawh tih sawiin, Mizoram atangin Alu pawh tharchhuah tum a ni tih a sawi a, tunah hian NEC atangin cheng vbc. 2 sengin a chi siamchhuak tura hmalakna kalpui tum a nih thu leh Thingdawl Farm-ah hmalak tum a nih thu a sawi bawk.

Serchhip District Agriculture Officer (DAO) Tlangtimawia Zote kaihhruai he hunah hian FOCUS Serchhip District-a DPM K. Laltlanmawia chuan Mini Feed Mill an buatsaih dan tarlangin, kum 2021 khan FOCUS Project atangin khawl leina tur cheng nuai 10 an dawn thu leh a khawl bunna tur building hi RKVY-RAFTAAR atanga sak a nih thu a sawi a, hei bakah hian FOCUS hmalakna hian kum 2021-ah Serchhip District-a khaw 18-ah Vaimim chingin khaw 11-a chhungkaw 268 ten Vaimim an thar quintal 976 chu an leikhawm sak leh thu a sawi a. Hemi atang hian kuthnathawktute chuan Rs. 19,50,140/- an hmuh thu a sawi bawk.

Heng an Vaimim lei te hi ranchaw siamna atana hmang tura hmalak nghal a ni tih DPM chuan sawiin, AH&Vety Department-a mithiam te enpuina hnuaiah ran Chaw siam hi kalpui niin Vawk Chaw hi kg. khat zelah Rs. 28/- leh Ar Chaw hi Rs. 45/- in nikum December 7 khan hralhchhuah tan a ni tih a sawi a, tunah hian Vawk Chaw hi quintal 186 hralh tawhin Rs. 5,20,800/- hmuh a nih tawh thu leh Ar chaw quintal 31 hralh tawhin Rs. 1,39,500/- an hmuh tawh thu a sawi a, a vaiin ran chaw hralhna atangin Rs. 6,60,300/- hmuh a ni tawh tih a sawi a, heng te hi District chhung bakah khaw hrang hrang atanga an rawn lei thu te a sawi bawk.

Mini Feed Mill hi Co-operative Society ah Animal Feed Producing Co-Operative Society Ltd. tiin Registration buaipui mek a ni a, tihfel anih hnu ah Co-Operative Society hnuai a Registered Farmers te ah hlan tum a ni.

Comments

Popular News (Last 30 Days)