HPC in Sakawrdai-ah Total Bandh huaihawt an tum

Sinlung Hills Council (SHC)-a sawrkar dinglai paihthlak tuma hmalakna awm duhloh lantirna atan Hmar Peoples Convention (HPC) Party chuan naktuk March ni 1, 2022 atangin Sakawrdai-ah tiamchin awm lovin Total Bandh neih an tum.

Inrinni-a HPC Party General Hqrs. Office Bearer thukhawm chuan SHC sawrkar tluang taka a kal laia HPC leh MNF inremna zah lova sawrkar paih tuma hmalakna leh SHC zahawmna humhimna atan Sakawrdai area-ah March ni 1, 2022 atangin tiamchin awm lovin Total Bandh neih an rel a, a tul dan ang zelin SHC Area pumpuiah pawh Total Bandh hi puan chhunzawm zel an rel bawk.

HPC Party chuan thuchhuah siamin, SHC General Election hmasa ber atana HPC Party leh MNF ten thawhdunna an ziah kha a zahawma, tihchhiat an duh lo tih an sawi a. Hetihlaia MNF Member 3 leh Independent 3 in chhan mumal awm lo taka sawrkar paihthlak tumna Motion an pulut chu an dem tih an sawi a. SHC-a sawrkar ding lai namthluk tumtu te hian sawrkar siam tumin an vir kual mek tih sawiin, an thiltih hi titawp vat turin sawrkar an ngen bawk a. Member 6-in sawrkar an rintawklohna an thehluh ngaihtuah tura Feb. 18,2022-a chawpchilh taka Session koh kha HPC member te hian Official Notification an dawng lo tih sawiin, an telloa nawrluih Session chu an pawm lo hul hual tih an sawi bawk.

Total Bandh neih an tum chhan hi sawrkar dona ni loin, hnam phatsantute thil tih duhlohna leh SHC tluang taka a kal theihna tura tih a ni tih an thuchhuah ah chuan an sawi a. Political party sawi lova he hmalakna hi thlawp vek turin an ngen nghal bawk. SHC-a MNF member 3 leh Independent 3 te chuan Feb. 16, 2022 khan Council sawrkar rintawk lohna (No Confidence) motion chu SHC Chairman hnenah an thehlut a, Feb. 18,2022 khan SHC Special Session koh niin, Deputy Chairman kaihhruaina hnuaiah member 6 te chuan sawrkar lai chu an phar thla a ni.

Comments

Popular posts from this blog

Tukverh-a tlasual boral