Mizoram-a ASHA te lungawi loh lantirna Serchhip District-ah pawh ASHA in an zawm

All Mizoram ASHA (Accredited Social Health Activist) ten an hnathawhna lawmman lak ngiata nawrh an huaihawt mek chu Serchhip District-a ASHA te pawhin thlawpin an hna an chawlhsan rih mek.

All Mizoram ASHA te hian National Health Mission (NHM) hnuaia Scheme hrang hranga an hnathawhna lawmman (incentive) chu hun rei tak an dawn tawh loh avangin tunkar Thawhlehni, February 1, 2022 atang khan an hna hi an chawlhsan rih a, an lawmman dawn kim loh te hi a rang lama pe tura Mizoram sawrkar an phut thu sawiin, an lawmman dawn tur ang hi an dawn kim hma chuan an hna an chawlhsan rih tur thu hi an sawi a ni. Hetianga nawrh an huaihawt avang hian Serchhip District-ah chuan Village Health Nutrition Day (VHND) puala thla tin Thawhlehni hmasa ber-a hun hman thin te, naupai leh nausen ten thla tin Nilaini hmasa ber a Vaccine an la tur an hruai leh an hrilh thin chungchang ah te harsatna a thleng chho tan a, rampum huap-a Vaccine chungchanga hmalakna erawh kalpui a awm rih loh avangin harsatna a thleng rihlo nia thudawn niin January thla a Report an thehluh tur erawh an thehluh fel tawh avangin harsatna a thleng lo bawk a. Amaherawh chu ASHA te hi Health Department hnuaia nu leh nausen hriselna kawnga hmalakna hrang hrangah chhawr ber te zing ami an nih avang leh Sub-Centre lamin an chhawr tam avangin harsatna hi a thlen thuai a rinawm tih kan thudawnna chuan a sawi.

Thudawn danin ASHA te hian Assure Incentive thla tin Rs. 2000/- dawng thinin hei hi nikum April thla atang khan an dawng tawh lova, tunhnaiah sawrkar chuan thla thum (3) atan sum pechhuakin ASHA te hnenah pekchhuah mai theih a ni a. JSY hnuaiah nau nei tur leh raipuar vaccine la turte hruai thinin heta an lawmman hi nikum September thla hnu lam an la dawng lo a. Malaria kaihhnawiha hna an thawhna hrang hrang lawmman te chu November 2020 chin lain a hnu lam an la la lo a, nausen an pian atanga thla kua (9) an nih thlenga Vaccine kim taka la tura an hrilh ziaha Vaccine an lak kim (Fully Immunised) chuan Incentive dawn neiin hei hi nikum January thla hnu lamah an la dawng lo bawk a. ASHA te hi nau piang reng reng te chu In lama piang an nih chuan an pian atanga thla khat leh a chanve chhungin vawi 7 leh damdawi In-a piang an nih chuan vawi 6 tlawh tura tih niin hemi lawmman erawh hi chu an dawn that thu an sawi thung.

Mizoram pumah hian ASHA 1091 an awm mek nia thudawn niin Serchhip District-a ASHA 64 te pawhin he nawrhna hi thlawpin January 31 khan Serchhip CMO-ah an lungawi-lohna thu leh an thilphut te hi an thlen a ni. Serchhip District chhungah hian Serchhip Main Centre hnuaiah ASHA 25 awmin Thenzawl CHC hnuaiah 10, Chhingchhip PHC-ah 7, North Vanlaiphai PHC hnuaiah 7, East Lungdar PHC hnuaiah 5, Khawlailung PHC hnuaiah 6, Ngentiang PHC hnuaiah 4 an awm a ni.