Sik leh sa-ah Mizoram danglam lutuk lova, Ruahtui tlak hun inthlak hret hret thung

Mizoram sik leh sa-ah inthlak thleng danglam lutuk a thleng lo a, ruahtui tlak danah erawh a kum telin a tlak hun a inthlak chho hret hret thung.

Science & Technology Department thawktute hnen atanga thudawn danin Mizoram-ah chawhruala lakin khaw lum leh vawt-ah thil danglam lutuk a thleng lo a. Kum 10 kalta chhunga kumtin khaw lum leh vawt dan chawhrual (average) chu 21.17°C a ni tiin Mizoram-a khua a lum chhoh chhan ber chu khawvel lum chho zel (global warming) vang a ni ber tih an sawi a, Mizoram chhung ang bikah chuan thing leh mau kan tihchereu nasat vang leh khawpui thang chho zelin hmasawnna hnathawh (infrastructure etc) a tam vang niin an sawi. 

Science & Technology Department thawktute chuan chawhrualin khaw lum laiin kumtin a lum telh telh a, khaw vawh laiin a vawt telh telh bawk tih sawiin, “Khaw vawh laia a hniam lam (minimum) a hniam avang ngawtin khua hi a vawt lo a, a lum lam (maximum) a vawh tel bawk avangin a vawt ta thin a. Chutiang zelin khaw lumah pawh a lum lam degree a san (maximum) vang ngawt lum ni lovin khaw lum laia a minimum a san tel vangin a lum ta thin a ni,” an ti bawk. 

Kumin January thla bikah Temperature hniam lai ber chu January 29, 2022 zing dar 5:22 vel kha a ni a, 8°C a ni a, hei hi ni khata a vawh lai ber (daily minimum temperature) kha a ni a. Daily minimum temperature hi January thla bikah chawhrualin 13.1°C a ni. Temperature san lai ber chu Januay 8, 2022 chawhnu dar 1:55 vel kha a ni a, 23°C a ni a, hei hi ni khata a lum lai ber (daily maximum temperature) kha a ni a, Daily maximum temperature hi January thla bika chawhrual chu 19.2°C a ni. Ni khat ni lenga khaw lum leh vawh dan (daily average temperature) ah chuan January 28, 2022 kha a vawt ber a, 11.0°C a ni. January thla chhunga ni tina khawlum leh vawh dan chawhrual (monthly average of daily average temperature) chu 16.2°C a ni.

Ruahtui chungchangah Fur/ruahtui tlak dan chu a insawn hret hret a, tlem tlemin Fur ruah tui kan tih hi a tlai hlek hlek niin an sawi a, “Ruahtui tlak dan mumal lo tih hian tlak hun bi, Fur lai kan tih ang hi a insawn hret hret a. A tam leh tlem thuah chuan nasa taka tlem ta duai emaw a la ni rih chiah lo nain, ruahtui tla hi a tlem telh telh a. Khawvel sik leh sa inthlak hi kan tuar ve a ni ber e,” an ti.

Chhinchhiahna atanga a lan danin nikum chhunga Mizoram sik leh sa chawhrual chu 22.2°C a ni a, kum 10 chhuanga Mizoram sik leh sa chawhrual chu 21.17°C a ni a. Nikum chhunga Mizoram vawh ber chu January 23 leh 25 niin 9°C a ni a, a lum ber ni chu May 25 niin 34°C a ni thung. Kum 10 kalta chhunga khaw vawh ber chu January 13, 2017 niin 2.7°C a ni a, a lum ber chu April 13, 2017 niin 36.5°C a ni. Nikum 2021 chhung khan Mizoram-ah ruahtui 1917.6mm a tla a, ni khata ruahtui tlak tam ber ni chu October 21, 2021 niin hemi nia ruahtui tla zat chu 58.8mm a tling a ni.