Chanchin thar lawrkhawm :

IAS Book Corner hawng

Mizoram Youth Commission (MYC) in Chief Minister hova an lo rel tawh anga State Central Library, MINECO Khatla-a ‘IAS Book Corner’ an siam chu nimin khan MYC Chairman Dr. Vanlaltanpuia MLA chuan a hawng a, MYC Chairman chuan Mizo thalai te chu he IAS Book Corner hi hmang tangkai turin a sawm a ni. IAS Book Corner atan hian MYC chuan State Central Library hnenah cheng nuai 10 a pe a, lehkhabu engemaw zat lei tawh niin a tul anga lei belh zel tum a ni. IAS Book Corner hawnna hun hi MYC Secretary Donny Lalruatsanga chuan kaihruaiin State Librarian Zirsangzuali chuan lehkhabu lei dan leh IAS Book Corner buatsaih dan te a sawi bawk a ni.

MJA te hriselna enfiah sak

Lunglei District-a Mizoram Journalist Association (MJA) Member te tan Civil Hospital Lunglei chuan nimin khan a thlawna inentirna hun an buatsaih a, he hunah hian MJA member mi 16 ten an hriselna dinhmun endik turin hming an pelut a, Investigation hrang hrang leh tul dang te buaipui a endik hna Hospital-a thawktu ten thawh sak an ni. District Medical Superintendent Dr. SR. Ngurchamliana chuan hun danga an la tih ngai loh MJA Lunglei member te puala Free Health Check-up an buatsaih thei chu thil lawmawm tak a ni tih sawiin, MJA te chu Civil Hospital Lunglei-in tun dinhmun a thlen theihna kawng hrang hrangah sulsutu pawimawh tak an nih thu a sawi bawk.

MIMA in SOP thar beisei

Mizoram Merchant Association (MIMA) Gen. Hqrs. hruaitute chuan nimin tlai khan Chief Minister Zoramthanga chu a Pisa-ah hmuin Dawr inhawn chhawk titawpa Dawr inhawn vek an rawtna chu a thlawp niin an sawi a. Beauty Parlour, SPA, Gym leh Movie Threater thleng pawha hawng tawh tura an ngenna chu tha a tih thu pawh sawiin, SOP thar a chhuah vat an beisei thu an sawi bawk.

Certificate hlanna nei

Lunglei huamchhunga Business Idea intih-siakna 'Leitlangpui Rahbi 2020-2021' a titha thlanchhuah Enterpreneur 23 te hnena Winner Certificate hlanna hun chu nimin khan Lunglei HPC Conference Hall-ah neih a ni a, he hun hi HPC Vice Chairman Lawmawma Tochhawng MLA chuan a hmanpui a ni. Leitlangpui Rahbi Micro Start Up Capital Competition hi mahni kutke a ding tura tumna leh duhna neite, sumdawnna idea neite tana Business Idea intihsiakna niin a vawi khatna ah mi 15 te bultanna pek an lo ni tawh a ni.