Serchhip District Civil Supply Officer (DCSO), C. Zadailova chuan tunhnaia Assam leh Mizoram ramri buaina thleng avanga hun engemaw chen ei leh bar lakluh kawnga harsatna thleng chu ramri-ah buaina a ziaawm tak avangin mipuite tan chi-aina tur a awmloh thu a sawi a, Serchhip-ah buhfai chhekkhawl sa pawh ala tam thu a sawi bawk.
Serchhip Sub-Hqrs. YMA hmalakna ramri Vengtute tana mipuite thawhkhawm chu nimin khan Vairengte-ah hlan fel a ni.
Nimin khan Serchhip District-ah COVID-19 hri kai mi 3 hmuh belh leh niin Serchhip District-ah hri kai enkawllai mi 58 an awm mek.
Nimin khan Serchhip District-a khaw 13-ah African Swine Fever (ASF) vangin Vawk 38 a thi leh.
Khualkhua atanga Serchhip District Hospital-a damlo boral te ruang thawnchhuahna turin Serchhip Sub-Hqrs. huamchhunga YMA Branch ten tunlai hian Kuang an thawhkhawm leh mek.
Serchhip bialtu MLA, Lalduhoma chuan a bial chhung Thenzawl CHC-a damlo a mamawh apiangte hman turin nimin, August 3, 2021 khan Ambulance a hlan.
Niminpiah khan Mizoram-ah Sample 9223 enfiah leh niin heng atang hian COVID-19 hri kai 748 hmuh leh an ni a, Sample enfiah atanga zaa 8.11 ten hri hi kaiin Mizoram-a COVID-19 hri kai hmuhchhuah chu mi sing li aiin an tam tawh a ni.
India ram UT leh State hrang hrang Covid vaccine la zat tam lamah tun dinhmunah Mizoram chu pasarihna a ni mek a. Tun thla tir thleng khan hri danna dawng tawh mi 8,28,867 an awm a ni.
Horticulture Department leh Clover Organic Pvt. Ltd. te tangkawp buatsaihin nimin zing khan a tumkhatna atan Lakhuihthei leh Dragon-Fruit chu Delhi-a thawnchhuah a ni.
Health Minister Dr. R. Lalthangliana chuan nimin khan Kolasib, Vairengte leh Kanhmun khua te tlawhin hri leng dona kawnga hmalakna hrang hrangte a enpui a. Ramri buaina avanga State pawn atanga thuthar lakhawmtu engemaw zat lo kalte chu thudik hailanna kawng a hmanraw tangkai tak a hmang thiam turin a chah bawk.