Tunkar Inrinni-a Tuirial Assembly bial Bye-Election neih tur atana inbuatsaihna chu tluang taka kalpui zel niin inthlang turin an inpeih thawkhat tawh tih Kolasib District Election Officer Dr. H. Lalthlangliana chuan a sawi.
Serchhip CMO Office-a thawktute chuan tunhnaia Serchhip bialtu MLA Lalduhoma’n CO-VID-19 hri leng dona tura khawl a pek, Fluorescent Immunoassay (FIA) hmanga Sample enfiahna chu hman a nih tawh thu an sawi.
Serchhip District-a COVID-19 hri kai hmuh tawh zawng zawng chu mi sang li aiin an tam ta.
Serchhip District-ah COVID-19 hri kai hmuh belh zel a nih avangin khawtlang in hri kai enkawlna tur hmun an ruahman, Community COVID Care Centre (4C) 25 lai siam a ni tawh.
Mizoram-a COVID-19 hri kai hmuhchhuah tlahniam ve leh hretin niminpiah khan Mizoram-a Sample enfiah 8112 atangin hri kai mi 740 hmuh leh an ni a, Sample enfiah zawng zawng atanga za zela 9.12 te chuan hri an kai a ni.
School Education Department Director James Lalrinchhana chuan High School English Grammar Zirna Lehkhabu chu nimin khan a tlangzarh.
Nimin khan Lawngtlai-a District Level Child Protection Committee chu thukhawmin District Child Protection Unit (DCPU) hmalakna leh hmachhawp hrang hrang an sawiho.
Tunkar Inrinni-a Tuirial bial Assembly bye-election neih tur atana Campaign theih hun chu nimin tlai dar 6:00 khan a tawp ta a, Party hrang hrangte chuan hun tawp thleng hian Campaign hi an kalpui a ni.
Health Minister Dr. R. Lalthangliana chuan nimin khan Zoram Medical College (ZMC)-ah Genome Sequencing Laboratory leh ZMC Director Quarters a hawng a, ZMC chu kum 3 leh thla 2 leka upa ni mahse nasa takin a thang tih a takin a hmuh theih tih a sawi.