Chanchin thar lawrkhawm :

PM chungah Governor lawm

Mizoram Governor Hari Babu Kambham-pati chuan nimin khan a Twitter account kaltlangin Prime Minister Narendra Modi hnenah lawmthu a sawi a. PM Modi-a hmathlirna thui tak hnuaia Union Budget 2022-23 tha tak siam a nih thu leh he Budget chhunga mi, PM-DevINE Scheme chuan India hmarchhak State te tan hmasawnna lian tak tak a thlen dawn a ni, a ti. Governor chuan Mizoram chhunga hmasawnna ruhrel siamna tura project 2 thawh nan cheng vbc. 600 lai kan dawng tur chu thil lawmawm tak a ni tih pawh sawiin, hei hian Mizoram in hmasawnna nasa tak a neih phah dawn tih a sawi bawk.

CM in kawng siam tur en

Mizoram PWD (Highways) ten Thenzawl leh Lunglei inkar kawng World Bank Road, Fur hmaa siam ngei ngei ngai tura an lo chhinchhiah tawh te chu nimin khan Chief Minister Zoram-thanga hovin enfiah a ni a, kawng thawmthat ngai te, leimin avanga kawng thlang bal ta siamthat ngai te en a ni. Chief Minister hi Adviser to CM (Technical) Er. K. Lalsawmvela leh Mizoram PWD-a Officer ten tawiawmin Serchhip DC Nazuk Kumar leh Thenzawl SDO (C) Amol Srivastava ten Thenzawl-ah a lo dawngsawng a ni.

MJWS Governing Board in rel

Mizoram Journalist Welfare Society Governing Board chu nimin khan thukhawmin mi 13 te hnenah Medical Assistance pek nise an ti. I&PR Auditorium, Aizawl-a Mizoram Journalist Welfare Society Governing Board thut-khawm hi an Chairman leh I&PR Secretary HM. Hualsangi hova neih niin Jornalists' leh an chhungte damlohna avanga damdawi In a an in enkawlna hrang hrang (Medical Assistance) chu mi 13 hnena pek an remti a, hun remchang hmasa berah thutkhawm leh nise an ti bawk. Mizoram Journalist Welfare Society hi kum 2007-2008 khan din tan a niin MJA member leh an chhungte thihna leh damlohna khirh bik tuar te hnenah ralna leh chhawmdawlna an pe thin a ni.