Chanchin thar lawrkhawm :

Lunglei-ah Skill Training hawng

Mizoram Youth Commission buatsaih Skill Training for Cement Mistiri and Food Processing chu nimin khan Lunglei District-ah a hawnna neih a ni a, Lunglei District tan hian Cement Mistiri training tur mi 40 lak tur anih laiin mi 12 in an dil a, Food Processing-ah mi 20 lak tur niin mi 8 in an dil bawk a ni. He Training hi tun thla ni 28 atang khian kalpui tan tur niin Cement Mistiri training hi MYC Coaching Centre Lunglei-ah neihpui an ni ang a, Food Processing hi Seling Food Processing Centre-ah training an nei anga. Training an neih chhung hian nitin stipend Rs. 250 an dawng dawn a ni.

MSHCS-ah inziahluh theih

Kum 2022 April atanga March 2023 chhung atan sawrkar hnuaia damdawi-a inenkawlna senso bill ve thei lo te'n an inenkawlna senso te an bill ve theih nan Mizoram State Health Care Society chuan  February ni 21, 2022 atanga May ni 16, 2022 thleng Health Care Scheme hnuaia inziahluh theihna hun a hawng leh dawn a, mahni awmna hnai ber Sub-Center ah ngaihven tur a ni ang. Inziahluhna man hi AAY(Card eng) nei tan Rs.200/-; PHH(Card pawl) nei tan Rs.1000/- leh Non-NFSA(Card var) leh Ration Card neilo tan Rs.2000/- a ni ang. Inziaklut duh te chuan mahni awmna hnai ber Health Sub-Center ah ngaihven tur a ni ang.

MSU in zawng tan dawn

MSU General Hqrs. chuan diklo taka Tribal Certificate nei Kamrul Laskar chu Tribal Certificate a neih surrender tura an tih-a huntiam an pek chhunga a surrender duh tak loh avangin amah zawnna hi neih tur a ni tih nimin khan thuchhuah siamin an tarlang a, MSU Hqrs. hrang hrang leh Branch hrang hrangte chu an huam-chhungah a zawn hna lo thawk tura an hriattir bakah MSU General Hqrs. atanga zawng turte chu Vawiin, Feb. 19, 2022 chawhma dar 10:00 hian Aizawl-a MSU Pisa Pui-ah kal tur a nih thu an tarlang bawk.

Blood Storage Centre buaipui

Corporate Social Responsibility (CSR) atanga District Hospital, Khawzawl-a Blood Storage Centre dah tura hmalakna kal mek chungchangah niminpiah khan Khawzawl DC CC. Lalchhuang-kima chuan Khawzawl District Hospital tlawhin CMO Dr. Albert Lalhminghlua chuan a lo dawng-sawng a, Blood Storage Centre dahna tur hmunhma leh mamawh hrang hrang lei ngaite sawiho niin, chak zawk leh zau zawka hmalak dan tur sawiho turin thutkhawm neih thuai nise an ti a ni. District Hospital, Khawzawl-a Blood Storage Centre dah tur hian an District chhunga sawrkar hna lian thawktu Contractor-te hnen atangin sum mamawh pawh dawn kim thawkhat tawh a ni.

Sawrkar hrim hrim tum lo

Mizoram Pradesh Congress Committee (MPCC) President Lalsawta chuan nimin khan Kolasib tlawhin Kolasib Press Club-a thuthar thehdarhtute a kawmna ah sawrkar hrim hrim an tum a ni lo tih sawiin, “Kan tu leh fate hlan-chhawn atan sawrkar tha hi kan siam dawn a, chu chu kan tum ber pawh a ni,” a ti a. “Vawiin ah hian kan kal tumna, kan kalna tur min kawh-hmuh thei, tuna kan sawrkar ang ni lo, tun aia sawrkar tha hi kan tlin a, a phutin kan phut bawk,” Lalsawta chuan tiin, “Mi tha bawm kan siam dawn lo, kan tlin lo, mahse, thatlohtheihlohna bawm erawh a kalphung avangin kan siam dawn a ni,” a ti bawk.