Myanmar atanga Mizoram-a raltlan te tanpui turin Mizoram in theihtawpin hma a la - Chief Minister

Chief Minister Zoramthanga chuan Myanmar buaina avanga Mizoram-a raltlan lo lut te tanpui turin Central sawrkar langtlang taka inrawlh a rem loh avangin Mizoram in theihtawpa a tanpui theihna turin hma a la niin a sawi a. Tunah hian Mizoram-ah raltlan hi mi sing chuang fe an awm nia chhinchhiah a ni.

Chief Minister Zoramthang hian amah kawmtu thuthar thehdarhtute hnenah he thu hi sawiin Myanmar ram buaina avangin Mizoram-ah raltlan tam tak an lo luh belh zel thu leh heng zingah hian an ram hruaitu mi pawimawh tak tak te pawh an tel tih a sawi a. Heng mite chungchangah hian sawrkar angin theihtawp an chhuah tih sawiin, tlawmngai pawl hrang hrang te leh Kohhran, Zirlai Pawl leh mipui, mi inphal te nen tanghoin raltlan te chhawmdawlna tur chi hrang hrangah theihtawp an chhuah tih a sawi a ni.

Tun dinhmunah Myanmar rama buaina a chhuah belh zel avangin Mizoram District hrang hrangah raltlan an pung thar mek a, Champhai Sub-Hqrs.YMA hruaitute chuan tunah hian Champhai District-ah Myanmar atanga raltlan mi 5,961 chuang an awm mek tih an sawi a, Tuipuiral Group YMA huamchhung ah mi 2700 an awm mek a. Hetihlai hian tunhnaia Zokhawthar-a raltlan engemaw zat chu Khawmawi-ah an kir leh nual tawh nia thudawn a ni bawk.

Champhai District dawtah hian Aizawl District-ah raltlan an tam ber niin a lang a, tunah hian raltlan 5,500 bawr vel awm anga chhut a ni a, Relief Camp-a awm chu mi 480 an ni a, mahni chhungte leh thiante bela awm mi 5,000 chuang an awm niin District thuneitute chuan an sawi a. Lawngtlai District-ah chuan raltlan hi 5,300 vel an awm a, Hnahthial District-ah 1,500 chuang an awm mek bawk.

Mizoram District hrang hrangah raltlan chhiarpui hi kalpui mek a ni a, Identity Card pek vek tum an ni a, Zirna leh hriselna lamah pawh a tul anga enkawl chhoh an ni ang. Raltlan tam ber hian an chhungkhat laina leh thiante an bel a, sawrkar leh khawtlang hruaitute’n Hall leh School-ah te an chentir bakah Relief Camp engemaw zat sak sakin chutah chuan an khawsa bawk. 

Heng raltlan rawn lut te hi an lo luh hlimin COVID-19 an kai leh kai loh endika khunghran an ni a. A dawng theite hnenah hri danna pek a ni bawk a. Naupang 2,000 vel chuan School-ah zirna an chhunzawm leh a, Board Exam-ah pawh an tel ve thei dawn a ni.