Medical lama mithiam ten mi 2 thihna la chhui zui mek

Nikum kumtawp lama Serchhip District Hospital-a mi pahnih thihna chungchanga Magisterial Inquiry report chu Medical lama mithiam ten an enzui leh mek.

Serchhip damdawi In-a mi pahnih thihna chungchang chhui chiang tura ruat Serchhip DC kalchhuak ta Kumar Abhishek chuan kumin January thla khan a thil chhuina report chu sawrkar-ah a thehlut tawh a, a report-a rawtna a siam angin Medical lama mithiam te'n an chhui leh mek a ni.

Hemi chungchanga thuthar thehdarhtute zawhna chhangin Health Secretary R. Lalram-nghaka chuan Magisterial Inquiry report hi zirchian a nih tawh thu sawiin, “A chhui chiangtu in a Medical kaihhnawih laite Medical lam chhui chiantir leh a rawt angin, chhui chiantir mek an ni. Report an rawn la thehlut lo,” a ti bawk. Health Secretary sawi danin, Medical lamin report an thehluh hnuah Magisterial Inquiry report nen enzuiin Serchhip District Hospital-a thil thleng chungchangah sawrkarin a tul angin hma a la dawn a ni.