Central Scheme tha tak tak Mizoram mipui mimir tam zawkin an hriatloh bakah an la dawng lo - Governor

Mizoram Governor Dr. Hari Babu Kambhampati chuan nimin khan Mizoram Presbyterian Kohhran Synod hruaitute chu Raj Bhavan-ah kawmin Mizoram mipui mimir tam zawkin Central Scheme tha tak tak, miharsate chawikanna atana kalpui mek te an hriat loh bakah an dawng lo tih a hmuh thu a sawi.

He inkawmna ah hian Governor chuan Mizoram chhunga Kohhran leh Tlawmngai pawl hrang hrang ten mipui vantlang hmasawnna atana sawrkar tha taka an thawhpui thin thu sawiin, anmahni senso nena State hmasawnna atan an luangchhuak thin chu State danga NGO leh Sakhaw dang vuantute tan pawha entawn tlak leh chhuanawm a ni tih a sawi a. Hripui leng avanga harsatna a thlen lai te, buaina liantham deuh a thlen chang te, Sakhaw hrang hrang betute inkarah inunauna a awm theihna atan leh miharsa te tanpui kawnga Kohhran ten theihtawp an chhuah thin chu ropui a tih thu a sawi a, sawrkar an thlawpnaah lawmthu a sawi bawk.

Governor chuan Mizoram a awm chhung reiloteah mi chi hrang kawm tawhin hmun hrang hrang a tlawh tawh thu a sawi a. Heng atang hian Mizoram mipui mimir tam zawk hian Central Scheme tha tak tak, miharsate chawikanna atana kalpui mek te an hriat loh bakah an dawng lo tih a hmuh thu a sawi a. Central Welfare Scheme tam tak te hi Mizo mipui ten dil nachang an hriatloh chhan chu zirtirna pekchhuah that tawkloh vang a nih thu sawiin, theihtawpa tanlak a la ngaih thu a sawi a, Nodal Department te leh Bank lampang te pawh hemi chungchang hi la sawipui a tum thu a sawi a. Helam hawia Awareness Campaign atan Kohhran hruaitute chu a mi rin berte zinga mi an nih thu leh Kohhran a rawn penchhuah phawt chuan hma kan sawna, Central Welfare Scheme kaltlanga mi tam zawkin mal-sawmna an dawn ngei a rin thu a sawi bawk.

He hunah hian Mizoram Synod hruaitute hi Moderator Rev. Dr. Vanlalnghaka Ralte hova telin Mizoram sawrkar leh Kohhranho te chu englai pawha Mizoram hmasawnna tura lungrual taka thawkho thin an nih thu sawiin, hma an lo lak tawhna te bakah hri leng chungchanga hma an lo lak ve na te an sawi a, Mizoram Presbyterian Kohhran 118 te pek leh leh Synod sumpui atanga tanpuina pek tawh zawng zawng chu a vaiin Rs. 11,86,25,504/- a tling a ni.

Comments

Popular posts from this blog

Tukverh-a tlasual boral