Lenkawl

Health Minister, Dr. R. Lalthangliana chuan COVID-19 (Corona Virus) laka Mizote kan fihlim theihna turin Lengpui Airport atanga khualzin lolutte endik hna kal mek chu Inrinni khan a hmunah a tlawh a, Covid-19 endikna khawl pawh Mizoram in a lei thuai tur thu sawiin, ramdang mite lo luh khap chungchang ngaihtuah mek a ni bawk.

Mizoram-a ei leh in lamna hmun leh thlenna In, Hotel, Restaurant leh khualzin buaipuitu Tour Operator leh Tour Guide te tan sawrkar-ah registration tih vek a tul tawh dawn.

Serchhip Bazar-a Vawksa zuartute chuan sawrkar phalna-a phai anga Vawk lakluh theih a nih tak avangin Vawksa a harsatna thleng thin chu sutkian a nih tawh thu an sawi.

Tunhnaia eirawngbawlna Gas man tihhniam a nih hnua Mizofed Serchhip ten a man to a Gas an hralhna atangin cheng sing thum chuang chu mipui hnena peklet tura laklet sak an ni.

Nimin March 8, 2020 kha 'International Women’s Day' niin Serchhip-a One Stop Centre chuan Catholic Kohhran Hmeichhia te nen hun an hmang a ni.

Mizoram sawrkarin Liquefied Petroleum Gas (LPG) bottling plant siam a tumna, Bairabi chu Thawhlehni khan Mumbai atangin Indian Oil Corporation Ltd. (IOCL) hotute chuan an tlawh a, a hmunhma leh a zauh danah an duhthu a sam tih an sawi.

Presbyterian Kohhran hnuaia Hmeichhe pawl, Kohhran Hmeichhia ten inkhawmpui an neih loh kum-a Rorel Inkhawm an neih thin chu nimin Pathianni hmang khan Ramhlun Venglai Kohhran Biak In-ah neih a ni a. Kumin Rorel Inkhawm-ah hian Palai 902 kalin kumin hi Kristian chhungkua Golden Jubilee a ni a, Inrinni chawhma khan Synod Moderator, Rev. R. Lalchangliana chuan kum 50 tlin hriatrengna (monument) a hawng bawk a, nakum-a Kohhran Hmeichhe Inkhawmpui Lian chu East Lungdar-ah neih a ni ang.

Mizoram Pradesh Congress Committee (MPCC) chuan COVID-19/Conovirus chung-changa sawrkar hmalakna chu tlai lu deuh hret-a an ngaih thu an sawi.