Kangmei chhuakin mi tam tak tan harsatna a thlen thin avanga mitin kan fimkhur a tul - Chief Minister

Chief Minister Zoramthanga chuan kangmei chhuakin mi tam tak tan harsatna a thlen thin avanga mitin kan fimkhur a tul thu a sawi.

Tun thla ni 12 thlenga hman tur Kangmei Ven Hapta (Fire Prevention Week), 2022 hawnna nimin-a Synod Conference Centre-a neih a hmanpuina ah he thu hi sawiin Chief Minister chuan nikum-a Mizoram chhimlama nasa taka kawngmei chhuakin mi tam tak tan tawrhna a thlen thu sawiin, kangmei chhuak tam tak hi ven theih thil a nih avangin leh, kangmei laka invenhim hi kan ngaihpawimawh phawt chuan kan ram hi nasa takin hma kan sawn tur thu a sawi a. “A vannei ber tur chu keini kan ni dawn tih hria in kangmei laka kan inhumhim theih nan kangmei venna hapta kan hawn hian mitinah keima tan, kan chhungkaw tan, kan khawtlang tan a ni tih kan thinlungah kan dah theuh dawn nia,” tiin mipuite chu a chah bawk.

He hunah hian Environment, Forest & Climate Change Minister TJ. Lalnuntluanga pawhin Forest Survey of India report in Mizoram pum chhutin 28.28% chu kangmei chhuah hlauhawm berna hmunah puangin, 49.73% chu kangmei chhuah hlauhawmna leh, kangmei chhuah hlauhawm lohna chu 2.2% chauh a nih thu a sawi a. Heng a nih avang hian Mizoram sawrkar chuan kangmei ven chu a ngaihpawimawh thu a sawi a. Dt. 31.1.2000-a State Level Committee on Fire Prevention din a nih atanga thahnem ngai taka hmalak a nih dan a sawi a. District leh khaw tina kangmei ven kawnga hmalakna hriatpui nan leh intihphur tawn nan a kumtin State Level leh District Level lawmman buatsaih a nih thu a sawi bawk.

Kangmei venhim hna hi a taka hma la turin sawrkar chuan a mal beih theihloh thu leh, chumi atan chuan NGO hrang hrang, Kohhran leh mipui thahnemngai tak takte nen tawhho a hma lak a nih dan Minister chuan a sawi a, kumin thupui ‘Kangmei ven hi mi tin mawhphurhna a ni’ tih chu mitin in pai a, mahni mawhphurhna te vawng tlat turin a chah bawk.

Forest Survey of India chuan January 2021 atanga nimin thleng khan ramkang hi hmun 12,726-ah a hmu a, Spot verification report angin November 2020-May 2021 chhunga hmuh chu hmun 4486 a ni a, chu chu 14153.08 Ha. vel a ni. Hemi kang atang hian hmun 205 (2562.18 Ha.) chu sawrkar ramngaw kang niin hmun 4281 (11590.9 Ha.) chu vantlang leh mimal ram kang, bawlhhlawh hal leh lo hal atangin a ni.

Sawrkar laipui in ramngaw kang ven nan CSS Scheme - Forest Fire Prevention & Management Scheme neiin kumtin cheng nuai 100 vel State a rawn pe thin a, he pawisa hi sawrkar ramngaw chauh nilovin vantlang ram ven nan pawh hman tel thin a ni bawk.