April 22-ah Sub-Hqrs. YMA Rorel Inkhawm neih rel

Serchhip Sub-Hqrs. YMA chuan Inrinni khan Sub-Hqrs. YMA Executive Committee (SEC) Meeting neiin April 22, 2022 khian Sub-Hqrs. YMA Rorel Inkhawm neih nise an ti.

SEC Meeting hi Serchhip Sub-Hqrs. YMA President Kawlthuama chuan kaihruaiin kumin hi Sub-Hqrs. YMA Conference neih loh kum a nih avangin Rorelna Inkhawm neih tur chungchang an sawiho a, YMA Sub-Hqrs. YMA Rorel Inkhawm vawi 3-na hi April 22, 2022 khian Serchhip Auditorium-ah neih tum nise an ti a, hemi atan hian Programme Committee pawh siam nghal a ni bawk. He Rorel Inkhawm-ah hian a hma lama chawimawina an lo pek tawh Sub-Hqrs. YMA huamchhunga Fa nei tam te hnenah leh YMA Kumpuan bawhzui tha te hnenah chawimawina hlan leh nise an ti a, he Rorel Inkhawm neih tura Agenda leh Member boral sun tur nei Branch leh Group te chuan March, 2022 ralhmain thehluh nise an ti bawk.

Tun tuma a SEC thukhawm hian Sub-Hqrs. YMA in Morgue Van an neih hman man bithliah chu ennawnin rate thar an pawm a, KRAM Infracon Pvt. Ltd. hnuaia Mizo hnathawk ten harsatna an tawh hrang hrang Sub-Hqrs. YMA hnena an thlen chu Office Bearers ten lo zir-chiangin hmalak zui tur leh pawimawh a awm a nih chuan a tul dan anga hmalak nise an ti a. YMA inrelbawlna atana thil pawimawh te pawh sawiho niin, Central YMA in Serchhip Sub-Hqrs. YMA Budget atana a ruahman Rs. 1,19,300/- chu Branch leh Group hrang hrangah an sem bawk.