Lenkawl

Chhiahtlang VLTF te chuan hri leng laka Mizoram a him theihna tura ramri-a duty te tanpuina atan nimin khan Serchhip Sub-Hqrs. YMA kutah Rs. 20,000/- an hlan.

Hri leng avanga pawl 12 (HSSLC) Exam neihlai chhunzawm theihloh chu nimin khan Mizoram pumah chhunzawm niin Serchhip-ah pawh Exam Centre, Govt. HSS Serchhip-ah Exam hi chhunzawm a ni a, Subject 5 Exam tur awmah Centre-a Exam lai mi 218 bakah hri leng avanga mahni Exam Centre-a Exam chhunzawm theilo mi 19 ten an Exam dawn a, Serchhip Centre a exam lai mi 3 te chu hmundang ah an Exam ve dawn bawk a ni.

Nimin atang khan Mizoram-ah zangkhai zawka inkharkhipna chu kalpui tan leh a ni ta a, Serchhip District Bawrhsap chuan zan lama mipuite pawn chhuah khapna thupek a tichhuak bawk.

Niminpiah-a Serchhip District atanga Swab Sample thawn zinga 20 te chu hri lakah an him tih nemgheh niin Sample dang pathum result ngaih-chan mek a ni.

Serchhip District Bharat Scouts & Guides te chuan nimin khan Serchhip-a damdawi In leh DC Office-ah te hmui tuamna (Mask) thahnem tak an sem.

Serchhip-VII Village Council chuan Rs. 6,15,376/- senga Ambulance an lei chu nimin khan COVID-19 do nan leh a tul apianga hman atan Serchhip District Hospital hnenah an hlan.

Nimin-a Serchhip District Bawrhsap hova Sa Zuartu leh Ar vulhtu pawl bakah tlawmngai pawl te thukhawm chuan Serchhip Bazar-a Sa chi hrang hrang man tur an bithliah.

Mizoram-ah COVID-19 hri kai enkawl dam an nih mek laiin nizan hmasa khan hri kai hmuhchhuah thar mi 9 an awm leh a, an vai hian Siaha District mi vek an ni.

Rotary Club of Aizawl chuan COVID-19 dona atan an luanchhuahna kal zelah nimin khan Aizawl Police Station leh Aizawl Press Club tan Mask, Hand Sanitizer leh sumfai an hlan.

Tourism Minister, Robert Romawia Royte chuan Zo Heritage Centre dinna tur hmun zawn mek a nih thu sawiin, Samtlang khawtlang hruaitute chuan Zo Heritage Centre atana ram pek an phal thu an sawi.

Health Minister, Dr. R. Lalthangliana chuan Mizoram chu Pathian in mal a sawm tih sawiin, “Thlamuang takin awm i la, kan tih tur chinah erawh thuawih leh strict takin awm ang u,” tiin COVID-19 hri do kawng ah Mizoram hmalakna chuan Sawrkar laipui fak a hlawh thu a sawi.

MZP in Remna Ni an hmang

MZP General Hqrs. buatsaihin nizan hmasa khan Ignite Studio-ah Remna Ni lawmna neih a ni a, he hun hi Deputy Chief Minister, Tawnluia chuan a hmanpui a ni. Remna Ni lawmna ah hian Deputy Chief Minister chuan Remna Ni chu Mizo National Movement in a hrinchhuah a ni tih sawiin, “Mizoram Buaina kan tih thin hi Helna leh Kawhmawh bawlna avanga lo awm a ni lova, Hnam Movement a nih avangin inbiakna pawh Political Level-ah neih a ni a. He Inremna hian Mizoram pawh dinhmun sang zawkah dahin Political and Administrative thil pawh a kengtel,”  a ti bawk. He hunah hian MZP General Hqrs. President, B. Vanlaltana pawhin zalen kan nih theihna tura nasa taka beitute leh Remna leh muanna kan neih theih nana theihtawp chhuahtute MZP chuan zahna chibai an buk tih a sawi bawk.

MIMA in lawmthu an sawi

Mizoram Merchant Association (MIMA) chuan MIMA leh sumdawng pawl hrang hrang ten sawrkar an ngenna ngai pawimawha dawr leh sumdawnna hmunte hawn phal a ni ta chu an lawm takzet tih thuchhuah siamin an tarlang a. Sumdawngte chu mahni dawr theuhah midang nena inkarhlata awm ngai pawimawh turte, Sanitizer kawl theuh turte, Dawr nghaktu leh a dawrtu ten hmui tuamna hmang vek turte, Kut silfaina ngai pawimawh tur leh Thingpui leh tui inna no inhman tawm lo turte in an chah bawk.

Sialhawk-a hnathawh enfiah

Sialhawk NGO Coordination Committee chuan Sialhawk Water Supply Scheme hna-thawh mek chu nimin khan Khawzawl PHE Department JE, Laltlinpuii hovin an enfiah a, RCC Main Reservoir sakzawh tawh thenkhat chu a foundation lungrem a that tawkloh avangin hna-thawktute hnenah remtha leh tura hriattir nise an ti a. Chowkidar Quarters sak mekah drawing leh estimate-a inmil lo tam lutuk chu ngaimawhin Estimate leh drawing nena inmil tura sak a nih theih nan thuneitute hnenah thlen nise an ti bawk.

Tuialhthei man sang thlen