NABARD sum hmanga School sak leh siamthat ah hnathawh thalo 6 hmuh a ni tawh - Education Minister

School Education Minsiter, Lalchhandama Ralte chuan NABARD sum puk hmanga School building sak leh siam thatah School 35 endik tawh atangin hnathawh tha tawk lo 6 hmuh a ni tih House a hrilh a. Hemi chungchanga zawhna chhanna eptu member ten an duhkhawp loh avangin House chhungah inhnialna hun engemaw chen a chhuak a ni.

Nimin-a Assembly thutkhawm zawhna leh chhanna hunah Congress Group Leader Zodintluanga Ralte zawhna leh zawhbelhna dangte a chhanna ah School Education Minister Lalchhandama Ralte chuan NABARD sum puk hmanga School building sak leh siam thatte chu tunah hian Department-in Final Bill pek tlak an ni tawh em tih finfiah turin hnathawh hrang hrangte an enfiah mek a, School 35 an tlawh tawh atangin Engineer ten 29 chu tha an tih thu an sawi a, a dang 6 chu a nih tur ang ni phak lo, siamthat ngai awm a ni a. Amah ngeiin Department hotute hnenah hnathawh chu a nihna ang taka tih tur a ni a, a enfiahna pawh dik taka tih tur a ni a, hnathawk tha lote chu Bill pawh pek loh tur tih a hrilh tih a sawi. 

Lalchhandama Ralte chuan, a bial chhunga hnathawh tha lo ni-a sawi pawh thudik a awm nual tih sawiin, amah ngei a hmunah a kalnaah an Party hotute a sawipui a, hnathawh tha tak tak a awm laiin hnathawk tha lo pahnih khat te avangin Zoram pumah an hmai a bal thei a, a bial mi ni mahse an thawh that loh chuan Bill an pe dawn lo a, an ti tha leh vek tur a ni tih a hrilh tih a sawi a. Department Engineer-te chu a bial-a hnathawh te a hmasa lamah endik a, siamthat ngaite siamthat tir tur leh Zoram hmun dang atang pawh an entawn tlak ni tura hmala turin a chah tih a sawi a. RTI Act hmanga zawhna chhannaa Completion Certificate pek tawh anga tarlan te chu Final Bill pek an ni tihna a ni lo tih sawiin, School thuneitu leh endiktu hmasa ten hnathawh zawh tawh tih tarlanna, Completion Certificate pe mahse, Department Engineer ten an endik phawt loh chuan Bill pe lo turin an ti tih a sawi.

Education Minister chuan, NABARD sum hmanga building sak leh cheithat hi COVID-19 len nasat laia hnathawh a nih avangin hmanraw lak kawngah hnathawktuten harsatna an tawk nasa a, ramri a lo buai lehzel bawk avangin hmalak a harsa em em tih a sawi a, Congress MLA ten an endik tuma fello ni-a an hmuhte pawh thlak nghal tur leh thil kimlo te chu siamtha turin an ti a, an thil hmuh dan hi a hnenah ziakin thlen se chu a ngaipawimawh hle dawn a, chutiang chuan ti chiah lo mahse, Media kaltlanga an thu puante chu a theih ang angin an bawhzui a, thil dik lo nia langte chu an siamthat tir tih Minister chuan a sawi a ni.

School Education Minister sawi danin, NABARD sum puk hmanga School building sak leh siam that hi Lushai Engineers, CB Engineering leh Allied Concern-in an thawk a ni.
(ela)

Comments

Popular posts from this blog

Tukverh-a tlasual boral