India ram State te zingah Covid test titha leh ti tam ber te zinga mi kan ni - Health Minister

Health Minister Dr. R. Lalthangliana chuan Mizoram chu India ram State te zingah Covid test ti tha leh ti tam ber te zinga mi kan nih thu sawiin, Mizoram-a hri kai hmuhchhuah atanga nunna chan tam lam chu 0.31% a nih thu leh India ram-a hniam berte zinga mi a nih thu a sawi.

Google.org, Program for Appropriate Technology in Health (PATH), Seattle, USA leh GiveIndia te tangkawpin an rawn pek Pressure swing adsorption (PSA) Oxygen Generation Plant (800 LPM) hawnna Inrinni kalta-a Christian Hospital Serkawn, Lunglei-a neih ah he thu hi sawiin Health Minister Dr. R. Lalthangliana chuan COVID-19 hrileng do kawnga theihtawp chhuahtu Kohhran te, Tlawmngai pawl te, khawtlang hruaitute leh mimal tlawmgnaite chungah lawmthu a sawi a. Mizoram chu India ram State te zingah Covid test titha leh ti tam ber te zinga mi kan nih thu leh tun dinhmunah test nuai 18 chuang tih tawh niin hei hi Mizoram population atanga chhut chuan 160% chuang a ni tih a sawi a. Test neih tawh atangin positivity rate chu 11% vel niin Testing kan tih tam avangin positivity rate pawh hi a sang lo theilo tih a sawi a. “Hri kai tam lam ai mahin nunna chan an tam leh tam loh ah hmalakna a that leh that loh hi min teh a, hetih kawngah hi chuan a ti tha kan ni a. Mizoram-ah COVID-19 avanga nunna chan mi 655 awm tawhin Death Rate 0.31% hi India rama hniam berte zinga mi a ni,” a ti bawk.

Health Minister in a hawn tak Christian Hospital Serkawn-a PSA Oxygen Generation Plant hi Minute khat-a Oxygen litre 800 siam chhuak thei niin nikum October 27 khan hnathawh tan a ni a, December 2021 chhungin Civil Works zoin tun thla ah bun fel a ni a. He khawl hian chatlak awm lovin khum 500 a chawm thei a ni.

A plant chhungah hian Electrical Control panel, Compression Unit, Air dryer, Air tank, Geolite chamber, Oxygen Tank litre 2000 dawng leh khawl dang te awmin 250kVA transformer leh backup te pawh bun nghal a ni. Heng khawl rawn pek te hi a zavaiin nuai 150 man hu a ni.