Lenkawl

Zirtawpni kalta atanga Serchhip leh Keitum inkara Chuanhnuai ramkang chu Inrinni chawhma lamah thelh mit-a haw san a nih hnuah nizan hmasa zanrei lamah khan a kang leh a, nimin zing khan mi tlawmngai ten kangmei hi thelh lehin chawhma lamah an thelh mit a ni.

Serchhip District Magistrate, Dr. Lalzirmawia Chhangte chuan bungrua a van huna hlawk zawka hralh beiseina avanga mipui mamawh bungrua (essential commodities) a ruka chhekkhawl (hoarding) chu phalloh a nih thu sawiin, hetiang thil hi ti lo turin mipuite chu a hriattir.

Kanhmun-ah venhimna uluk

Home Minister, Lalchamliana chuan Inrinni tlai khan Mizoram Police (MRP), Assam Rifles (AR), Border Security Force (BSF) leh All Mizoram NGO Committee aiawhte kawmin ramri a venhimna kalpui dan (Border Security Management) chungchang a sawipui.

India rampum-ah Lockdown kalpui a nih tak avanga ramchhung hmun hrang hranga Mizoram mi 600 vel tangkhang mangangte tanpui turin Lok Sabha MP, C. Lalrosanga chuan State 20 chuang thuneitute hnenah ngenna a thlen.

Mizoram State pawn atanga Mizoram chhunga nitin mamawh phurhluh dan tur chungchanga inrawnkhawmna chu Inrinni khan Transport Minister, TJ. Lalnuntluanga hovin neih a ni a, he inrawnkhawmna-a an thusawi atang hian Transport Department chuan bungraw phurhluh chungchanga zawm tur inkaihhruaina, Standard Operation Procedure (SOP) a duang dawn a ni.