Chhiahtlang Hmar Veng Branch YMA hmalakna a Chhiahtlang hmarlam dai-a Volleyball Court siam thar chu nimin khan KRAM Infracon Pvt. Ltd. Chief of Project Amit Goel chuan hawngin hemi puala Volleyball Tournament buatsaih pawh a hawng nghal bawk.
Nimin khan Serchhip District-ah COVID-19 hri kai hmuhchhuah an awm laiin enkawl dam an awm belh lova, hri kai enkawllai pawh mi 14 an tling leh ta.
India ram zalenna champhaphak vawi 75-na lawmna, Azadi ka Amrit Mahotsav kal zelah nimin khan India Prime Minister Narendra Modi chuan Himachal Pradesh khawpui Shimla-ah Sawrkar Laipuiin mipui dinhmun chawikanna tur Scheme hrang hrang a neihte puanzarna a nei a, he hun hi Serchhip atang pawhin sawrkar mi pawimawh ten an lo zawm a ni.
Nimin khan khawvel ram hrang hrangah mihring te tana Meizuk thatloh zia inzirtirna ni, ‘World No Tobacco Day’ chu hman niin Serchhip-ah pawh National Tobacco Control Programme (NTCP) ruahmanna ni All Saints School-a zirlai naupangte nen hun hman a ni.
Mizoram Board of School Education (MBSE) chuan kumin a pawl 12 tana Higher Secondary School Leaving Certificate (HSSLC) Exam a buatsaih result chu nimin khan a tichhuak a, kumin hian zirlai Exam 11,908 zingah 9773 te pass in pass percentage chu 82.07 a ni a, nikum (87.80%) aiin 5.73% in pass an tlem zawk a ni.
Niminpiah khan Mizoram-ah COVID-19 hri kai mi 19 hmuh belh leh niin nimin khan hri kai zingah mi 36 te enkawl dam an ni thung.
Mizoram Governor Hari Babu Kambhampati chuan nimin khan Rural Development Department hotute kawmin Mizoram-a Pradhan Mantri Awaas Yojana - Gramin (PMAY-G), Housing for All Scheme tia hriat bawk kalpui dan leh an harsatna te a zawt.