Nimin Sept. 13, 2012 khan Serchhip District-ah COVID-19 hri kai mi 94 hmuhchhuah niin Serchhip District-ah ni khat-a hri kai hmuh tam ber ni a ni.
Pathianni khan Mizoram-ah Sample 1744 enfiah niin heng atang hian COVID-19 hri kai 541 hmuhchhuah an ni a, hri kai hmuhchhuah hi tam lo mah se Sample enfiah zawng zawng atanga chhutin za zela 31.02 te chuan hri hi an kai a ni.
African Swine Fever (ASF) hri leng mek avangin nimin khan Chhuanthar Tlangnuam-ah Vawk pathum a thi ve leh a, heng Vawk thi te nen hian Serchhip District-a khaw 29-ah ASF vangin Vawk 3574 a thi tawh a, nimin ah District chhung khaw hrang hrangah Vawk suat a awmlo bawk a ni.
Nimin zing khan Serchhip Chanmari Veng Nursing School panna kawngthlang ah ruang pakhat chhar niin Lalruatfela (21), Chanmari Veng tih finfiah a nih hnuah nimin khan vuiliam nghal a ni.
ZPM Leader Lalduhoma chuan Party pahnih ten kan ram an kaihhruai tawh dana lungawi tawklo leh a aia tha beiseitu zawng zawng chu ZPM-ah an lo welcome vek tih a sawi.
Mizo kutchhuak ZoPharm Hand Sanitizer leh Disinfectant te chu nimin khan Health Minister Dr. R. Lalthangliana chuan a Pisa-ah a tlangzarh.
Myanmar tualchhung buaina avangin Mizoram-ah Myanmar atanga raltlan an rawn luh belh zel.
Land Revenue & Settlement Department changtu Minister Lalruatkima chuan National Highway 06 leh National Highway 306 siamthatna tura hmalakna ah dan dik lova pass pek tumna a awm loh thu sawiin, dan ang thlapin ram neitu dik tak te leh kut hnathawktute tan erawh Valid Pass siamsak chu sawrkarin a tum mai zawk niin a sawi.