Zing zawka buhfai endik tum tawh thu sawi

Supply Minister K. Lalrinliana chuan, sawrkarin Food Corporation of India (FCI) atanga buhfai a leite chu a thianghlim tawk em tih finfiah turin zing zawka endik an tum tawh thu House a hrilh.

Nimin-a Assembly Session-ah Congress Member Lalridika Ralte zawhna leh zawh belhna te chhangin Supply Minister chuan, FCI atanga buhfai an lei te chu kar hnih danah buhfai bag pawn lam leh a Godown surface area chu Malathion Chemical a kah thin a ni a, rannung ten an bawm loh nan buhfai bag ho chu Quality Control dan anga 80:20 ratio in thla thum chhung thla tin Deltametrince chemical in kah thin a ni tih leh buhfai te rannung in an lo bawm palh a nih chuan Alphos chemical hman thin a nih thu a sawi a, Quality Control Wing Guidelines angin a hman dan tur dik tak hmanga chemical hi hman a nih avangin mihring tan leh ran tan a hlauhawm lo tih Minister chuan a sawi a. Heng buhfai te hi endik thin tur a nih angin a stock hlui leh engemaw avanga chhia te pawh an endik tir zauh zauh thu leh tun hnuah erawh zing zawkin an lo endik tawh tur thu a sawi a ni.