Latest News

Lungzawl zau-a Lei dawh tur lungphum phum a ni

Bungtlang Lungzawl Zau Mat Lui-a Suspension Bridge dawh tur lungphum chu nimin khan Agriculture Department Director Rohmingthanga Colney chuan Lei dawhna tur hmunah a phum.


Lungphum phumna puala hun hman ah Agriculture Department Director Rohmingthanga Colney chuan kuthnathawktute tana tangkai tak tur Lei dawh tura hmalakna a awm chu lawmawm a tih thu sawiin, Agriculture Department chuan hmasawn zawnga kal an tum thu leh amaherawh chu a harsat thu a sawi a. Hemi kawnga an hmalakna ah FOCUS Project a lo awm chu an tangkaipui thu sawiin, kuthna-thawktute pawhin an tangkaipui ngei a beisei thu a sawi bawk.

Serchhip District Agriculture Officer (DAO) Tlangtimawia Zote kaihhruai he hunah hian FOCUS-a State Project Director leh Agriculture Department Joint Director RK. Nithanga chuan tuna an Lei dawh tur chu FOCUS hnuaia an Lei dawh hmasak ber tur a ni tih sawiin, a tira ruahmanna ah chuan tun thla chhunga zawh tur ni mah se Bungtlang khua ah hri leng a hluar avanga Containment Zone-ah hun rei tak puan a nih avang leh hnathawktute pawh luh theih a nih loh avangin hna hi tan tlai a ni tih a sawi a. Amaherawh chu tun sawrkar kum chhunga zawh ngei an beisei thu leh sum pawh a awmsa vek thu sawiin, hna hi thawh zawh a nih a Completion Certificate pek tlak a nih chuan pekchhuah ve nghal tur a nih thu a sawi bawk.

He Suspension Bridge dawh tur hi FOCUS hmalakna hnuaia thawh tur niin Lei sei zawng hi meter 82 a thui tur a ni a, Rs. 16,47,771/- senna tura ruahman niin Rolins Engineer, Aizawl ten Lei dawh hna hi an thawk a, tunah hian Anchor Block chu thawh zawh a ni tawh a, thawktu mi 10 rual ten hna hi thawk mekin tun sawrkar kum chhung ngeia zawh hman an tum thu hna-thawktute chuan an sawi a ni.

Comments

Popular News (Last 30 Days)