Serchhip Mat phai Zawlpui zau Leilet-ah 'Khawl hmanga Buh seng runpui' chu nimin khan neih niin he hun hi Agriculture Minister C. Lalrinsanga leh Bialtu MLA Lalduhoma te chuan an hmanpui a, Agriculture Minister chuan Zawlpui zau-a bul lo tantute thawhrimna leh tumruhna fakin, an zarah Buh tharna hmun zau tak kan lo nei ta a ni, a ti.
District Child Protection Unit (DCPU) Ser-chhip hnuaia Jail Inspection Team te chuan nimin khan Serchhip District Jail tlawhin Jail-a awm mek te zingah naupang, kum tlinglo an awm leh awmloh an enfiah.
Serchhip Heritage Society in Serchhip Kawlri tlang-a ‘Chawngpuii Khawthlir’ an sak chu nimin khan Art & Culture Minister R. Lalzirliana chuan a hawng.
Electoral Roll Special Summary Revision neih meka Serchhip District tana Observer tura ruat Zarzosanga, Revenue Department leh RD Department-a Secretary ni bawk chuan nimin khan Serchhip District rawn tlawhin Electoral Roll ennawn hna thawh mek te a rawn enfiah.
All Mizoram Karate Association (AMKA) buatsaih AMKA State Karate Championship vawi 24-na chu nimin khan khelh zawh niin Serchhip atanga kal Karate thiam te chuan Medal an la vek a ni.
Nimin tlai thleng khan Serchhip District-a COVID-19 hri kai hmuhchhuah chu 5112 an tling tawh a, hri kai hmuh atanga za zela 93.17 te chu enkawl dam an ni tawh.
New Delhi-a cham mek Mizoram Chief Minister niminpiah tlai khan DoNER Minister G. Kishan Reddy chu a pisa-ah hmu in, Mizoram economy chungchang an sawidun.
Mizoram-ah ni khat-a COVID-19 hri kai hmuhchhuah zat a la tlahniam hret hret a, niminpiah khan Sample 3726 enfiah atangin hri kai mi 398 hmuh niin Sample enfiah atanga za zela 10.70 te chuan hri an kai a, nimin tlai ah khan hri kai enkawllai chu mi sang li aiin an tlem tawh zawk a ni.
New Delhi-a cham mek Sports Minister Robert Romawia Royte chuan niminpiah khan Union Youth Affairs & Sports Minister Anurag Singh Thakur chu New Delhi-a a chenna In-ah kawmin, India ramin Sports-a hma a sawn zel dan turte an sawidun.
Tunhnaiah COVID vei dam tawh nia inhria, he virus in an taksa a harsatna a siam engemawzat damdawi Inah an hmuh tawh thu Civil Hospital Aizawl-a Medicine Specialist Dr. J. Lalramchhuanga chuan a sawi.
Nimin khan Health Minister Dr. R. Lalthangliana hovin SAD Conference Hall-ah Mizoram COVID-19 dinhmun thlirhona neih a ni.