EWS hnuaia Project 6 thawhna tur lungphum Governor in MZU Campus-ah a phum

Economically Weaker Section (EWS) Scheme hnuaia cheng vbc. 60.31 senga thawh tur Project 6 bul tanna tur lungphum chu nimin khan Mizoram Governor Hari Babu Kambhampati chuan Mizoram University (MZU) Campus-ah a phum.

Lungphum phumna puala inkhawm neih ah Governor chuan zirlaite tana zirna tha tak pe tura MZU in theihtawp chhuahna leh a tanlakna te Central sawrkarin a hriatpui a. Hmasawnna ruhrel lian tak tak sakna tur sum a rawn ruahman chu a lawmawm takzet a ni, a ti. Tunah hian MZU chu University naupang te ni mahsela India ramah pawh University tha pawl tak a ni tawh a. He hlawhtlinna ropui tak hi Mizoram tan chuan inchhuanna tham a ni, tiin tun dinhmun MZU in a thlen theihna kawngah hian thawktute inpekna leh zirlaite hlawhtlinna a langsar hle a ni, a ti a, a bik takin tuna Vice Chancellor leh a thawhpui fak an phu hle a ni, a ti bawk.

National Institutional Ranking Framework tehna ang chuan Mizoram University chu kum 2020 chhung khan India rama University thazual zinga 67-na a ni a. Times Higher Education Impact Rankings 2021-in khawvela University thazual 1115 a thlanchhuah zinga 601 leh 800-na inkarah Mizoram University chu a lang pha a. Kum 2019 khan NAAC chuan Mizoram University chu ‘A’ Grade a pe tawh bawk a ni.

EWS Scheme hnuaiah hian MZU Campus-ah Seat 100 awm theihna Boys Hostel pakhat cheng vbc. 10.7 in sak a ni anga, Seat 100 ve ve awm theihna Girls Hostels pahnih chu cheng vbc. 21.28 sengin leh Academic Building pakhat cheng vbc. 15 sengin sak a ni dawn a. PUC Campus-ah Seat 50 awm theihna Boys Hostel pakhat cheng vbc. 5.85 leh Academic Building pakhat cheng vbc. 7.46 in sak a ni bawk ang.

He project hnathawhna sum hi MZU chuan Ministry of Education hnuaia University Grant Commission atangin a hmu a, Engineering Projects (India) Limited (EPIL) chu he project thawk tura thlan niin thla 18 chhunga an hna thawk zo tura tih an ni bawk.