Ni khat-a hri kai hmuhchhuah zat tlahniam hret

Mizoram-ah COVID-19 hri kai hmuhchhuah la pung zelin mah se ni hnih chhung chu ni khat-a hri kai hmuhchhuah mi sang khat aiin an tlem ta.

Zirtawpni khan Mizoram-ah Sample 4299 enfiah niin hri kai mi 907 hmuhchhuah an ni a, ZMC-a RT-PCR Laboratory-ah Sample 428 enfiah niin hri kai mi 71 hmuh an ni a, Lunglei-a RT-PCR Laboratory-ah Sample 34 enfiahin hri kai mi 13 hmuh an ni a, Fluorescent Immunoassay Test hmangin Aizawl-ah Sample 51 enfiahin hri kai mi 4 hmuh niin Serchhip District-a Sample enfiah 26 atangin hri kai mi 16 hmuh an ni bawk. District hrang hranga TrueNat Laboratory-ah Sample 135 enfiahin hri kai mi 45 hmuh an ni a, Rapid Antigen Test hmanga Sample enfiah 3625 atangin hri kai mi 758 hmuh an ni bawk.

Inrinni khan Mizoram-ah Sample 3171 enfiah leh niin hri kai mi 901 hmuh belh an ni bawk a, ZMC-a RT-PCR Laboratory-ah Sample 369 enfiahin hri kai mi 82 hmuh niin Lunglei-a RT-PCR Laboratory-a Sample enfiah 42 atangin hri kai mi 3 hmuh an ni bawk. FAI Test hmangin 81 enfiahin hri kai mi 22 hmuh an ni bawk. District hrang hranga TrueNat Laboratory-ah Sample 121 enfiahin hri kai mi 29 hmuh an ni a, Rapid Antigen Test hmanga Sample enfiah 2558 atangin hri kai mi 765 hmuh an ni bawk.

Inrinni khan Mizoram-ah hri kai enkawl dam mi 1408 awmin nimin khan mi 539 enkawl dam an ni leh bawk a, heti hian Mizoram-a hri kai hmuhchhuah tawh chu 2,13,117 niin an zinga 2,05,403 te chu enkawl dam an ni tawh a, hei hi hri kai atanga chhutin zaa 96.38 niin hri kai enkawllai 7058 an la awm a, mi 656 an boral tawh bawk a ni.

Comments

Popular posts from this blog

Tukverh-a tlasual boral