Mipui thuawihna avangin harsatna nasa lutuk tawk lo

Chief Minister Zoramthanga chuan Mizoram chu ramchhung State zawng zawng zingah Covid hripuiin a nuai nat pawl a ni tih sawiin, hripui vangin buaina tam tak tawk mahse Mizoram mipuite chu thu awih tak an nih avangin harsatna nasa lutuk an tawklo tih a sawi.

AIR Palai in a kawmna ah he thu hi sawiin Chief Minister chuan Mizoram in hripui leng vangin buaina hrang hrang a tawk thin a, amaherawhchu heng buaina karah hian mipuite chuan sawrkar atanga thuchhuak an zawm tha hle a, mipui nawlpui dinhmun endik, Mass Test emaw khuahkhirhna emaw te awm thin mahse tha takin an zawm mai zel a ni, a ti.

Chief Minister Zoramthanga chuan tunhnaiah Covid-19 test na an neih belh thu a sawi a, heng test na an neih belh hmang hian hri vei pung zel tur chu a tih tlem a beisei tih sawiin, Northeast State zinga hripui dona kawnga titha pawl an nih leh ngei a beisei tih a sawi bawk.

Tun dinhmunah Mizoram chhung District 11-ah Covid-19 hri kai sang chuang nei District pathum an awm mek a, Aizawl District chu a sang ber niin hri kai enkawllai 8027 an awm mek a, Mamit District-ah hri kai enkawllai 1264 awmin Lunglei District-ah 1230 an awm mek a. Hri kai enkawllai za aia tlem nei Siaha District chiah awmin enkawllai 69 an awm mek bawk a ni.