Hri kai 72 hmuh belh leh

Nimin khan Serchhip District-ah COVID-19 hri kai mi 72 hmuh belh niin hri kai mi 60 te enkawl dam an ni thung.

Nimin a Serchhip District-a hri kai hmuhchhuah thar ah hian Thenzawl khua atanga hri kai hmuhchhuah tam leh berin mi 38 lai hmuhchhuah leh an ni a, Serchhip-ah hri kai mi 14 hmuh ni bawkin Khawlailung-ah 10, East Lungdar-ah 4, Chhingchhip-ah mi 3 leh Hriangtlang, Hmunzawl leh Piler-ah hri kai mi pakhat theuh hmuh an ni bawk.

Nimin a Serchhip bika hri kai hmuh te hi New Serchhip North-ah mi 8, Vengchung-ah mi 2 leh Tuikhuah Veng leh Saron Veng-ah mi pakhat ve ve bakah BSF-ah mi 2 te an ni.

Nimin khan Serchhip District-ah hri kai mi 60 te enkawl dam an ni ve leh bawk a, a hma lama report lo siam tawh ah tihsual palh a awm avangin nimin tlai thlenga Serchhip District-a hri kai hmuhchhuah tawh chu 9569 an ni a, hri kai hmuhchhuah zinga 8879 te chu enkawl dam ni tawhin hri kai hmuhchhuah atanga za zela 92.78 te chu enkawl dam an ni tawh a, hri kai enkawllai 665 la awmin hri kai zingah mi 25 an boral tawh bawk a ni.