Chanchin thar lawrkhawm :

Training kharna hmanpui

Ministry of Health and Family Welfare, Govt. of India bultuma tun thla ni 1 atanga Mizoram Nursing Council in a buatsaih Training of Nurses kharna chu nimin khan neih niin Health and Family Welfare Board Vice Chairman Dr. ZR. Thiamsanga chuan a hmanpui a. He training a tel Principal leh Nursing Superintendent te chu Nurse tha leh rintlak chherchhuak zel tura thahnem ngai taka tan la tur leh inpekna thuk zawk nena mahni thawh hi ram leh hnam tan a ni tih hria a theihtawp chhuah zel turin a fuih a. Nurse hna chu Pathian rawngbawlna pawimawh tak a nih avangin damlo te chungah tawngkam zaidam, hmangaihna leh taimakna lantir chunga thawh reng a tul thu te, Mizo Nurse te chu India ram mai bakah khaw-vel-ah pawh an duai loh thu te, Mizoram Nursing Staff te COVID-19 dona kawngah pawh an inpekna fakawm a tih bakah, Sawrkar pawhin Nurse te harsatna sukiang tura theihtawp a chhuah zel tur thu a sawi bawk.

YMA in hmalak zui zel tum

Central YMA chuan Dan lova Kuhva rah tawlhruk tihtawp a nih theih nan theihtawpin hma a la zui zel tih nimin khan thuchhuah siama tar-langin, thuneitu hrang hrangte pawh an sawipui thu leh he sumdawnna dik lo tak hi a tawp ngei theih nan chawl lovin hma an la zui zel dawn tih an tar-lang a. Sub-Hqrs/Group/Branch YMA zawng zawngte pawh mahni huamchhung theuhah dan lova kuhvarah tawlhruk a awm chuan hma la tura an ngen nawn leh bakah mahni area chhunga kuhvarah tawlhruk phur an hria emaw, an hmu emaw a nih chuan Police Station/Outpost hnai berah hriattir turin an ngen nawn leh bawk.

Union Minister rawn zin tum

Union Minister of State for Rural Development and Steel, Faggan Singh Kulaste chu tun thla tawplam khian Mizoram-ah rawn zin tumin nimin khan RD Minister Lalruatkima hovin lo dawnsawn dan tur sawiho a ni a, hei bakah hian Ministry of Rural Development hnuaia Department in Central Sponsored Schemes (CSS) leh Scheme dangte a kalpui mek chungchanga thu thlen tur te sawiho a ni. Union Minister hi karleh a rawn zin tum ni mah se engemaw rokhawlhna avangin February chawlhkar thumna velah rawn kal tura beisei a ni.

Hmalakna thlirletna nei

State Level Committee on Nasha Mukt Bharat Abhiyaan chu nimin khan Aizawl-a SAD Conference Hall-ah thukhawmin an hmalakna an thlirlet a, Nasha Mukt Bharat Abhiyaan in a tum ber chu thalai ruihhlo la ti ve lo te venhim bakah ruihhlo khawih mekte chhanchhuah a, nundan phung pangngaia an nun leh theih nan a tanpui a ni. Nasha Mukt Bharat Abhiyaan hi India rama District 272 ah kalpui niin Mizoram ah chuan District pathum (Aizawl, Champhai leh Kolasib) ah te kalpui mek a ni.