Chanchin thar lawrkhawm :

H&FW Board thukhawm

Health & Family Welfare Board Non-Official Member te chu nimin khan an Chairman leh Health Minister Dr. R. Lalthangliana leh Vice Chairman Dr. ZR. Thiamsanga hovin SAD Conference Hall-ah Health Department hnuaia SEDP kalpui dan tur sawiho in an thukhawm a, he hunah hian Mizoram-ah Primary Healthcare a pawimawh thu leh tihchangtlung a ngaih dan te sawi niin Healthcare chu sawrkar policy pawi-mawh tak a nih avangin SEDP hmanga Health System thuamthat dan tur sawi a ni. Sub-Centre leh PHC building thuamthat te, a la nei lo khuaa Health Clinic din belh te, Health Worker leh thawktu dang rawih belh dan turte leh Medical bungrua mamawh phuhruk dan bakah heng atana ruahmanna la siam dan tur te an sawiho a ni.

Minister hovin thukhawm

Nimin khan Champhai-ah Transport Minister TJ. Lalnuntluanga hovin District Transport Officer-te (DTO)-a thawktute chu thukhawmin DTO Office mamawh leh harsatna an neih te an sawiho a, he hunah hian Transport Minister chuan Transport Department chu mipui ten nen in hne hnai tak an ni tih sawiin, an hnathawhna kawng ah Department kaltlangin mipui tan engtin nge malsawmna an nih theih ang tih hi an ngaihtuah reng a ngai tih a sawi a. Lirthei khalh a eizawng te bakah mimal lirthei khalh ten lirthei an khalh reng rengin hawihhawm a tul thu a sawi bawk.

ZPM in tel zui loh an rel

ZPM Political Affairs Committee chuan tunhnaia Mizoram sawrkar dinglai chungchang ngaihtuaha BJP Office-a thutkhawm neiha an thu ngaihtuah te nimin khan Aizawl-ah ngaih-tuahin he huna an Party aiawha tel te thu leh hla an ngaihtuah hnuah tel zui ve tawh loh nise an ti a. BJP Mizoram Pradesh in an thawhpui ngei MNF sawrkar ring tawk lova Central sawrkar chakna hmachhuana namthluk an tum chu kan sawrkar dinglai hlawhchham zia lantirna ah an ngaih thu an sawi bawk a ni.

Vaccine dose 1084 pe leh

Nimin khan Mizoram-ah Vaccine Dose 1084 pekchhuah leh a ni a, heti hian nimin thleng khan Mizoram-ah mi 7,96,023 te hnenah Vaccine Dose 1-na pek ni tawhin mi 6,15,996 te hnenah Dose 2-na pek a ni tawh bawk a, mi 19,022 te hnenah Precautionary Dose pe tawhin Vaccine pek tawh zawng zawng hi Dose 14,31,041 a ni.

Rorel Inkhawm hun sawn

Mizoram Presbyterian Kohhran Hmei-chhe Rorel Inkhawm vawi 11-na thla thar March 11-13 chhunga Mission Veng Kohhran Biak In-a neih tura ruahman chu Kohhran Hmei-chhia Central Committee chuan Covid-19 leng dinhmun enin Synod Officers’ Meeting remtihna in May 26, 2022-ah a hun hi sawn hlat an rel.

Ramhmul damdawi tihpun dan tur zirhona nei

Champhai Forest Division leh State Medicinal Plants Board (SMPB) Mizoram tangkawp buatsaihin nimin khan Champhai-ah Resource Augmentation of Medicinal Plants (RAMP) Project kaltlangin ramhmul damdawi awm tawhsa tihpun leh venhim dan tur zirhona neih a ni a, he ruahmanna hi Champhai Forest Division hnuaia Village Forest Development Committee 4- Zote, Hnahlan, Ngopa leh Khawhai-ah te ramhmul damdawi awm tawhsa belhchhah tura phunbelh, humhalh leh enkawl chhunzawm kawnga hmalakna a ni.