RUSA 2.0 hnuaia building sak thar pahnih H&TE Minister in Aizawl-ah a hawng

Rashtriya Uchchatar Shiksha Abhiyaan (RUSA) 2.0 hmalaknaa Govt. T. Romana College leh Institute of Advanced Studies in Education (IASE)-a building sak thar te chu nimin khan Higher & Technical Education Minister Dr. R. Lalthangliana chuan a hawng.

Heng Building hawnna hunah hian Dr. R. Lalthangliana chuan Zirna In changtlunna, Infrastructure Development tel lovin zirna tha leh chhuantlak Quality Education neih a harsat thu sawiin, RUSA hnuaia College hrang hranga hmalakna tam tak a awm chu thil lawmawm tak a nih rualin Ministry of HRD lamin RUSA an kalpui dan chu a muangchang a, anmahni lamah zawk thil fello a awm avangin kawng thenkhatah kan duh angin kan kal chak thei lo a ni, a ti a. IASE chu Programme hrang hrang B.Ed, B.Ed (Multi Mode), M.Ed, M.Phil leh Ph.D thleng an kalpui avangin Institution pawimawh leh a bik tak an nih thu pawh a sawi. H&TE Minister chuan Zirtirtu te tan naupang an zirtir kawng, Teaching Skills-ah an intuaihriam chu thil tul leh pawimawh tak a nih dan te pawh he hunah hian a sawi bawk.

Govt. T. Romana College, Republic Veng-a Administrative Building sak thar hi cheng nuai 180 senga sak niin chhawng hnih a sak a ni a, Ground Floor-ah Principal Office leh Administrative Office te dah niin, 1st Floor-ah Department hrang hrang Room te dah a ni a. Building hi a dung feet 61 niin a vang hi feet 31 a ni a, Skyridge Construction & Consultancy Services, Aizawl ten an sak a ni.

Nimin-a Institute of Advanced Studies in Education (IASE) Republic Veng-a hawn tak hi cheng nuai 100 senga sak Educational Research & Resource Centre Building a ni a, chawng hnih a sak niin a satu hi Skyridge Construction & Consultancy Services, Aizawl an ni a. Ground Floor chu Parking atan leh Machine Room atana ruahman niin First Floor-ah hian Resource Centre leh Workshop Hall ruahman a ni bawk.