Mizoram-ah Sakei thlenpui

Aizawl Zoological Park-a Bengal Tiger pahnih (2) dah tur zinga pakhat chu Mizoram-ah rawn phurh thlen niin chawlhkar hnih vel Intensive Care-a dah hran a nih hnuah mipui en theih turin Sakei awmna tur (enclosure)-ah dah a ni ang.

Aizawl Zoo-a Range Officer Immanuel-a sawi danin, Sakei pahnih hi Aizawl Zoological Park-a Hauhuk nupa pkhat nen inthlenga Gauhati Zoo atanga lak a ni. Nikum February thla khan Hauhuk te hi Gauhati Zoo-ah hlan an lo ni tawh a; mahse, Sakei erawh Aizawl Zoological Park-a a dahna tur (enclosure) siamthat ngai a nih avangin lak a nih lawk loh hnuah, February 14, 2022 khan Sakei pakhat chu Mizoram phurh thlen a ni.

Immanuel-a chuan, “Sakei hi pahnih tur ni mah se, Gauhati Zoo lamin engemaw harsatna an neih avangin a nu zawk chauh hi lak phawt a ni a. A tul anga indawrin, a pa zawk pawh hi inpek dan kan la ngaihtuah dawn nia tiin kan inthlah a ni,” a ti a. Tuna Sakei an lak tak hi kar hnih vel tal Intensive Care-a dah hran a nih hnuah harsatna a awm loh chuan a dahna tur hmunah dah chauh tura tih a ni.

Sakei enkawlna senso hi State sawrkar tum tur a nih thu leh Sakei hian ni khatah Bawngsa kg 8 vel mamawhin, nitin pe thei tura an inngaih thu te, a kalphung pangngaiah chuan kar khatah ni ruk chhung chaw pek a, ni khat erawh chaw pek awl tur a nih thu a sawi bawk a. Aizawl Zoo-a an ramsa enkawlte chu chawm zo lo leh chaw pe tha tawk lo nia an sawi chu thudik lo a nih thu a sawi bawk.

Tun dinhmunah Aizawl Zoo-ah hian ramsa 400 bawr vel enkawl mek a ni a. Sahuan enkawl nana ramsa chaw bikah hian thla khatah Rs. 5,20,000/- bawr vel sen thin a ni a. Hetihlai hian mipui tlawh theiha hawn a nih lai khan Aizawl Zoo tlawhtu atangin thla khatah Rs. 1,50,000 vel hmuh thin a ni.