Hri kai sing tling dawn hnai

Serchhip District-ah COVID-19 hri kai an la pung zel a, hri kai hmuhchhuah tawh zawng zawng pawh mi sing khat an tling dawn hnai ta.

Nimin khan Serchhip District-ah hri kai hmuh thar mi 39 an awm leh a, heng te hi Thenzawl-ah 17, Serchhip-ah 16, Hmunzawl-ah 4 leh Chhiah-tlang-ah mi pahnih te an ni. Nimin a Serchhip District-a hri kai hmuhchhuah te hi Rapid Antigen Test hmanga hri kai hmuhchhuah te an ni a, TrueNat Laboratory leh Fluorescent Immunoassay (FIA) Test hmangin Sample enfiah a awm lo a ni.

Inrinni khan Serchhip District-ah CO-VID-19 hri kai mi 51 hmuhchhuah an ni bawk a, Thenzawl-ah hri kai mi 14 hmuh niin Serchhip-ah hri kai mi 13 hmuh an ni a, Khawlailung-ah hri kai mi 9, Chhingchhip-ah hri kai mi 6, Sailulak-ah mi 5, Chhiahtlang-ah 2 leh East Lungdar-ah hri kai mi pakhat hmuh an ni a, Serchhip District pawn lam atangin hri kai mi pakhat, Aizawl lam mi hmuh a ni bawk.

Inrinni khan Serchhip District-a hri kai enkawl dam awm belh lovin nimin khan mi 75 te enkawl dam an ni ve leh thung a. Heti hian nimin tlai thleng khan Serchhip District-a hri kai hmuhchhuah tawh chu 9944 niin an zinga 9103 te chu enkawl dam an ni tawh a, hri kai hmuh tawh atanga za zela 91.54 te chu enkawl dam ni tawhin hri kai enkawllai 815 an la awm a, hri kai zingah mi 26 an boral tawh bawk a, kumin ah mi 7 boral tawhin an zinga 6 hi Serchhip District Case niin pakhat hi District dang a ni thung.