Kawng siamtute Buk thiah sak

Khawzawl District a awm Ngaizawl khaw mipui lungawilo chuan PMGSY hnuaia an khaw kawng Alkatra luan hna leh White Topping hna thawktute Buk chu nimin khan an thiah sak.

Thudawnna in a tarlan danin Khawzawl leh Ngaizawl inkar kawng KM 13.4-a thui Black Topping leh White Topping hna hi PMGSY hnuaiah First Class Contractor Collin Lalsangpuii, Aizawl Electric Veng hminga thawh a ni a, a hnuaiah hian Romuanpuii Zadeng, Khawzawl chuan kawngpui siam hna hi thawkin kum 2017 atanga tanin kum 4 leh thla 3 chhung an thawh hnuah KM 3.7 a thui chauh an la thawk a. Hrileng vel avanga an hna hi thawk tha thei lova insawiin an zawh hun tura ruahman ah an zawh theih dawn loh avangin hnathawh hun pawhsei sak an dil a, an dil angin kumin (2022) March thla a tawp tawh tur chu September 2022 thleng pawhsei sak a ni chung hian an hnathawh dan enin hun pek belh chhung pawhin Ngaizawl khaw NGO Coordination Committee leh VC te chuan a zawh hman an rinloh thu an sawi a ni.

Hetiang a nih avang hian YMA lam leh PWD te chuan January 29, 2022 khan thutlukna siamin, February 15, 2022 ralhma ngeia White Topping hna tan turin midang an be rem a, amah-erawh chu Romuanpuii Zadeng hnathawktu tur midang luh a phal loh bakah hnathawh zawmna tur sum a lakchhuah hnuah pawh a thawk zawm duhlo niin an sawi a. He kawng siamthatna tura kawng daltu lian berah Romuanpuii Zadeng hi puhin Feb. 21, 2022 chhun dar 12:00 hma ngeia a hnathawktute leh khawl bakah hmanrua te nen he kawng hi chhuahsan tura phutin, nimin chhun khan an Buk te hi an thiah sak ta a ni.

Nimin a buk an thiah lai hian hnathawktu an awmlo nia thudawn niin nimin zing lam khan an inthiarfihlim nia thudawn a ni a, thuneitute nen inbiakna an nei zui nia thudawn a ni bawk.

Comments

Popular posts from this blog

Tukverh-a tlasual boral