Serchhip District-ah raltlan 284 awm mekin Refugee Camp siam a la ni lo

Myanmar ram buaina avangin Serchhip District-ah raltlan rawn lut mi 284 an awm mek nia chhinchhiah a ni a, heng mite tan hian Refugee Camp siam la awm lovin raltlan te hi tun thla chhungin ID Card pek vek hman beisei a ni.

Nikum December 20-a sawrkar in District Level Committee on Myanmar Refugee a din hnuah Serchhip District-a raltlan rawn lut te lo buaipui dan tur ngaihtuah hian nimin khan Serchhip DC Meeting Hall-ah he Committee hi an Chairman leh District Bawrhsap ni bawk Nazuk Kumar IAS hovin an thukhawm a, sawrkar in raltlan te dinhmun thehlut tura a tih angin kar hmasa khan Serchhip District-ah raltlan mi 265 an awm meh thu thehluh niin hemi hnu hian khaw pahnih ah raltlan rawn lut an awm belh leh avangin tunah hian raltlan mi 284 an awm mek thu he hunah hian tarlan a ni a, heng raltlan te hi mipa 81 leh hmeichhia 69 bakah naupang 110 niin mipa leh hmeichhia an nih tarlan loh mi 24 an awm bawk a ni.

Hriat theih chinah Serchhip-ah raltlan mi 113 awm mekin heng te hi Veng hrang hrang 7 ami te an ni a, North Vanlaiphai-ah raltlan mi 45 awm mekin Chhiahtlang-ah mi 25, Thenzawl-ah 19, Keitum-ah 13, Khawlailung leh Leng-ah mi 12 ve ve, Chhingchhip-ah mi 11, Thentlang khua ah mi 10, Bawktlang leh Ngentiang-ah mi 6 ve ve, Hmuntha leh Sailulak-ah mi 5 ve ve leh Zote South-ah mi 2 an awmnia chhinchhiah a ni bawk.

He hunah hian raltlan te hi ID Card siamsak vek an nih dawn thu leh tunah hian an nihna kimchang lakkhawm mek a nih thu tarlan niin tun thla chhungin ID Card hi pek vek hman tum an nih thu leh Serchhip District chu District hrang hrang zingah raltlan rawn lut tlemna pawl a nih thu bakah District dang nen khaikhinin a hautak lo pawl kan nih thu tarlan a ni a, raltlan te a hlawma dahna tur hian Refugee Camp pawh buatsaih ala awm loh thu tarlan a ni bawk.

He thutkhawm a tel tlawmngai pawl leh khawtlang hruaitute chuan raltlan anga rawn lut te zingah chhungte belh avanga raltlan-a inchhiarna a tel duhlo an awm thu an sawi a, heng mi te hi raltlan-a rawn lut tho an nih avangin raltlan chhinchhiahna ah ziahluh tur an nih thu tarlan a ni a. Dan leh thupek chungchangah Police, VC leh tlawmngai pawl ten Awareness an neih thu pawh he hunah hian tarlan a ni bawk.

High Level Committee on Myanmar Refugee chuan nikum khan Mizoram District tinah din tura a tih angin Serchhip District Level Committee on Myanmar Refugee hi din a ni a, Chairman-ah DC niin Member Secretary-ah SDO (Sadar) a ni a, Nodal Officer atan Addl. DC chu ruat a ni bawk.