Huaisen lawmman dawng turin Mizoram atangin Mizo naupang pathum thlan an ni

Indian Council for Child Welfare chuan Mizo naupang pathum Lalramliana, Vanlalfela leh Jolyn Malsawmsanga te chu huaisen lawmman (bravery Award) 2021 dawng turin a thlang.

Indian Council for Child Welfare in huaisen lawmman dawng tura thlan an nih thu hi tunhnai khan Mizoram State Council for Child Welfare te a rawn hriattir a. Kum dangah chuan huaisen lawmman hi India Republic Day-ah President in New Delhi ah a hlan thin a, kumin ah erawh hripui leng vangin Award hlan hun tur hi hriat a la ni lo. Mizoram State Council for Child Welfare thawktute chuan huaisen lawmman dawngtu te hi sumfai leh mdedal hlan an nih bakah New Delhi an kalna, ei leh in leh thlenna zawng zawng chu tumsak an ni thin tih sawiin, zirlai an nih chuan pawl XII an zir zawh thlengin an zirna senso zawng zawng hi Indian Council for Child Welfare chuan a tumsak thin niin an sawi a. Hriat theih chinah Mizoram atangin tuna huaisen lawmman dawng tur mi 3 tiamin Bravery Award hi mi 39 in an dawng tawh a, an zinga 12 hi an thih hnua dawng an ni.

Kumin a huaisen lawmman dawng tura thlan Lalramliana (11) s/o Lalrinchhana leh a thianpa Joseph Malsawmtluanga (13) s/o Suiliamkhama, New Hruaikawn khua te chu August 2, 2021 khan khua atang KM 1.5 vela hla Kurung luiah Mautuai khawrh tura kalin Mautuai an khawrh zo tui-a an cheng chu Joseph Malsawmtluanga hi tuiah a tla a, Lalramliana hian chharin a Awm-ah nemin thawk tir leh tumin vawi tam taka a nem hnuah a nunna a chhan a ni.

Vanlalfela (10) pawh hi a pa Lalrinthanga, Lungrang khua nen Nov. 24, 2020 khan an huan-ah hnathawka kalin an hnathawh zawh hnuah a pa chu chawhmeh zawngin tlang-ah a lawn chho a, a rawn chhuk lam chu a thingzar vawn chuan dawl zo lovin a lum a, a pa thi chhawnga awm leh thisen chhuak chu buaipuiin khawchhung lamah zualko in YMA te a pun hnuah mi tlawmngai ten an lak hnuah damdawi In panpui a ni a, a pa pawh hian ziaawm lam panin a huaisenna leh ngaihtuahna fing tak avangin lawmman dawng tura thlan a ni.

Jolyn Malsawmtluanga (15) s/o Lalmuankima hi Pukpui Health Sub-Centre a Ambulance hluihlawn tawha naupang infiam zinga mi Moses Lalruatfela (11) Nov. 30, 2022 tlai-a Electric in a man a chhanchhuah vanga huaisen lawmman hi dawng tura thlan a ni bawk.