Pawl hrang hrang ten Health Minister hnenah District Hospital sak thuai an duh thu lo thlen

Health Minister Dr. R. Lalthangliana chuan Inrinni khan Serchhip rawn tlawhin Serchhip a pawl hrang hrangte chuan Serchhip District Hospital sak thuai a nih theih nana hma lak sak turin Minister hnenah hian an lo thlen a ni.

Serchhip-a tlawmngai pawl hrang hrang telna NGO Coordination Committee chuan an Chairman leh Serchhip Sub-Hqrs. YMA President Kawlthuama hova Health Minister hi lo hmuin CSR Fund atanga Serchhip District Hospital sak a ni dawn ta nia lang chu lawmawm an tih thu hrilhin, Damdawi In thar hi NGO Coordination Committee leh Town chhunga VC hrang hrang leh Joint VC ten an lo rel tawh angin Bukpui ram-ah sak ngei nise tiin an lo thlen a, hemi chungchangah hian NGO Coordination Committee hruaitute chuan helai hmun hi mi thenkhat ten P&E Department ram anga an lo sawi thin avangin tlema harsatna a awm thu sawiin, amaherawh chu helai hi P&E Department ram ni lovin Village Council ten an enkawl ram a ni tih an sawi a ni.

NGO Coordination Committee hian Serchhip District Hospital-a Gynecologist chungchang pawh Health Minister hnenah hian an lo thlen tih sawiin, tuna thawklai chuan chawlh a lak avang leh chhan hrang hrang avangin midang dah rih mai tha an tih thu an thlen a ni.

Serchhip Thalai Pawl te pawhin Health Minister hnenah hian District Hospital sak a nih theihna tura CSR Fund kan hmu dawn ta chu lawmawm an tih thu lo thlenin, tuna Hospital awm mekna chu Hospital thar dinna atan a hmunhma ten a zawh tawh loh avangin NGO Coordination Committee in Bukpui ram-a sa tura ruahmanna an siam tawh chu an thlawp thu ziakin an lo thlen a. “Kan khawtlang hruaitu ten ruahmanna an lo siam tawhna hmun ah hian Damdawi In khum 100 awmna a rang lama min sak sak turin kan ngen che a ni,” an lo ti a ni.

Hetihlai hian MJA Serchhip District pawhin Health Minister hnenah hian lehkha lo thehlutin Serchhip chu ram laili-a awm a nih avangin Serchhip damdawi In pawh hmun hrang hrang atanga pantu an tam avang leh khum a tlem avanga harsatna a thlen thin thu an tarlang a. Tunhnaia CSR Fund atanga Khum 100 awm theihna tur District Hospital thar sakna tur hmuh beiseina a lo awm ta chu lawmawm an tih thu sawiin, mipui ten harsatna hrang hrang an tawh thin te sutkian a nih theih nan he sum hmanga Serchhip District Hospital Building thar sak thuai a nih theih nana hma lak sak turin an ngen a ni.