Higher & Tehnical Board thutkhawm nei

SEDP hnuaia Higher & Tehnical Board chu nimin khan Higher & Technical Education Minister Dr. R. Lalthangliana hova thukhawmin zirna sang zawk tihhmasawn nana hmalak dan tur kawng hrang hrang an sawiho.

SAD Conference Hall-a thutkhawm ah hian Board Chairman ni bawk Dr. R. Lalthangliana chuan Sawrkar flagship programme kalpui mek SEDP chu Sawrkar hmasa ten hmasawnna policy an lo kalpui tawh thin aia a huamzau thu sawiin, he ruahmanna hnuaiah hian thil tam tak a lengin a awm a, Sawrkar rorelna leh inawpna kalpui dan thlengin SEDP in a huam a, chuvangin Board hrang hrang kalpui dan pawh a inang thei lo a ni, a ti a. Sawrkar Budget tibuai lova hmun dang atanga sum ruahmanna leh tihdan ngaihtuah chu a ngaihpawimawh thu sawiin, sum sen ngai em em lo ang chi zirlai te kawng hranga fuih leh an ngaihtuahna bakah an thiamna tihzau leh tihpun nan Awareness neih te chu zirna boruak siamthat nan a tangkai thei nia a ngaih thu te a sawi bawk.

He hunah hian Higher & Technical Education-a Commissioner & Secretary Esther Lalruatkimi chuan zirna chungchanga hmalakna reng rengin entin nge zirna a nghawng teh nan hun a duh rei thu sawiin, Board hnuaia hmalakna tur duanna ah zirlai ten an hlawkpui leh an tangkaipui theih ang chi thil hrang hrang te ngaihpawimawh hmasak tul nia a hriat thu a sawi bawk.

He thutkhawm hian College hrang hranga Skill Development Course hrang hrang kalpui theih dan chungchang te; College a zirtirtu indaihloh phuruk nana hma ak dan chungchangte; College thenkhata PG zirna hawn a nih theih dan kawng zawn chungchangte; College Library te tihchangtlun chungchangte chu zau taka sawiho a ni a. Mizorama B.Ed. zirna hmun 4 tuna awm mek bakah hmun dangah pawh he degree zir theihna neih a tul thu leh hma lak dan tur chungchangte pawh sawilan a ni.