Latest News

MYC Youth Centre sak mek zawhfel a ni dawn hnai ta

Serchhip Darnam Tlang-a ‘MYC Youth Centre’ sak mekah hnathawktute chuan hna thawh tur atanga zaa 90 vel an thawh zawh tawh thu sawiin, May thla tir lamah chuan zawhfel hman tura an inbeisei thu an sawi.


MYC Youth Centre sak hna thawktu Brilliant Consultancy atanga he hna viltu John Vanlalfaka chuan February 2020 atanga sak tan Serchhip-a MYC Youth Centre ah hian hna thawh tur atanga zaa 90 vel chu zo tawha an in ngaih thu LENKAWL hrilhin, ro-khawlhna dang a awm a nih loh chuan April thla tawp lam emaw, May thla tirah emaw chuan zo thei tura an inbeisei thu a sawi a. Tunah hian hnathawh tur lian zualpui chu thawh zawh ni tawhin, chhung lam leh pawn lam-a Electrict fitting te, a chhuat phah, Ceiling siam, Railing siam te leh a bang chhung lam leh pawnlam hnawih mam te chu an hmabak lian zual a nih thu a sawi bawk.

Tarlan tawh angin Serchhip-a MYC Youth Centre sak mek hi NEDP leh SEDP sum cheng vbc. 3 senga sak tur niin Nov. 30, 2020 khan MYC Chairman Dr. Vanlaltanpuia MLA chuan a lungphum a phum a, kum thum chhunga sak zawh tura ruahman niin Brilliant Consultancy chuan a sak hna hi an thawk a, a chhungah hian Volleyball Court awm tura duan niin chhawng thum (3) tur a ni dawn a, a dung ft. 100 leh a vang ft. 85 tur niin, Motor dahna tur te, Chowkidar Quarters te, Mikhual 20 thlen theihna Room pahnih leh Committee Room te pawh awm tura duan a ni a. He hna thawktute chuan huntiam chhung ngeia sak zawh an tum thu leh rotling siam ngei turin hmanraw hman pawh an uluk thu helai hmun tlawhtu thu-thar thehdarhtute hnenah an lo sawi tawh a ni.

Comments

Popular News (Last 30 Days)