Kum 2021 chhungin ramkang vangin tum 28 koh an ni

Serchhip Fire Station chuan nikum (2021) chhung khan ram kang chungchang ah Emergency Call/Fire Call tum 28 zet an dawng.

Serchhip Fire Station atanga thu kan dawn danin nikum chhung khan Serchhip Fire Station hian kangmei chungchang ah Emergency Call/Fire Call tum 31 dawngin heng zinga tum 27 zet ram kang kaihhnawih a ni a, vawi thum dang erawh In kang vang niin kumin ah In kang avangin tum khat call an dawng tawh bawk a ni.

Serchhip Fire Station-a thawktute chuan hripui len avangin Motor leh inkhunghranna te damdawi hmanga an kah thianghlim thin thu an sawi a, Quarantine Centre te vawi 14 leh lirthei tum 15 damdawi hmanga an kah thianghlim thu an sawi a. Serchhip Fire Station-ah hian motor pahnih an neih thu leh Tui litre 2800 leh litre 3500 phurh theihna a nih thu an sawi a, tunah hian thawktu mi 8 an awm mek thu pawh sawiin, heng te hi Leading Fireman 1, Fireman 5 leh Driver mi 2 te an ni.

Serchhip-a kangthelhtu pawl te chuan khua a lo Thal chho leh tan dawn ta tih pawh sawiin, mitin te kangmei laka fimkhur tura an chah bakah ram tikang lo tura theihtawp chhuah turin an chah bawk a. Kangmei chhuak a lo awm palh a nih chuan rang taka an hnena hriattir tura chahin Phone No. 03838-222001/03838-222135 leh 8119884154-ah te biak theih an nih thu an sawi bawk a ni.