Lenkawl

Mizoram in tunhnaia khawpui chhunga lirthei chet vel dan felfai tak leh traffic dan zawm kawng a lawmman a lak lawmna atan Vawiin hian Aizawl-ah City Bus te chu mipuite tan chuanman zatve in an tlan dawn tih nimin khan UD&PA Minister K. Sapdanga chuan thuthar thehdarhtute kawmin a sawi a. Mizoram lawmman lak chu mi tinte thuawih zar a nih thu leh sawrkar dan zam mitinin an ngaih pawimawh vang a nih thu a sawi a, Mizoram-a lirthei chetvel dan kawngah Zonun zemawi a taka a lan thu a sawi a ni. Home Minister chuan khawpui chhunga lirthei che vel enkawltu ber chu Traffic Police-an nih thu leh Mizoram lawmman dawn chu mipuite thuawihna zar a nih bakah Traffic Police-te zar a ni tih an hriat reng thu a sawi bawk a ni.

Chief Minister Lalduhoma chuan Mizoram State University hmunpui tur chu Lunglei-ah dah tum a nih thu a sawi a. Lunglei Pukpui-a Mizoram Engineering College pawh nakum atanga Class tan thei tur a ruahman a nih thu a sawi bawk.

Ramchhunga Eklavya Model Residential School hrang hrangte infiamna lama inelna neih zawh takah Mizoram aiawhte chuan Medal 24 an la.

Tourism Minister Lalnghinglova Hmar chuan niminpiah khan Goa Chief Minister Pramod Sawant leh Tourism Minister Rohan Khaunte te kawmin Tourism lam hmasawnna tura State pahnih thawhdun chungchang a sawipui bakah Goa-a Mizo leh Northeast mi chengte hamthatna turte a thlen bawk.

Social Welfare, Women & Child Development Department changtu Minister Lalrinpuii chuan Mizo hmeichhiate chu an dinhmun a san chhoh zel rualin an mawhphurhna pawh a sang chho ve zel tih a sawi.

Thla thar Dec. 3-a Lai Autonomous District Council (LADC) inthlanpui neih tur chungchangah nimin khan Mizoram Peoples' Forum (MPF) Lawngtlai District Forum hruaitute leh Election Agent-te chu an thukhawm.

Saitual District chhunga awm Lenchim khua chuan nimin khan an khaw kum 50 tlinna, Golden Jubilee an lawm a, Bialtu MLA leh Minister Prof. Lalnilawma chuan a hmanpui a ni.