Mizoram-ah COVID-19 hri kai hmuhchhuah thar ala tlahniam hlei thei lova, niminpiah khan Sample 3500 enfiah niin hri kai mi 311 zet hmuh leh an ni a, Mizoram-a hri kai hmuhchhuah chu 23,014 an tling tawh a ni.
Mizo Students’ Union (MSU) General Hqrs. chuan 'MSU Smartphone for BPL/AAY Students' an kalpui mekah nimin khan a thawh khatna atan Mobile Phone an semchhuak.
Mizoram Sawrkar Health Department chuan Covid Care Centre (CCC)-a ei leh in (diet) chungchangah ruahmanna thar a siam.
ZPM Legislature Party chuan tunhnai lawka kan ram chhunga Assam sawrkarin a sipaite a rawn tir ta mai leh a lo nawrlet tura beitham taka hmalakna a awm chu pawi an tih thu an sawi.
High School Leaving Certificate (HSLC) leh Higher Secondary School Leaving Certificate (HSSLC) Examination-a zirlai tithate hnenah nimin khan ‘Chief Minister's Award’ hlan a ni.
Mizoram-a COVID-19 vaccine pek hna kalpui mekah karleh Thawhtanni atang khian raipuar te vaccine pek tan tum a ni.
Mizoram leh Assam ramri chungchangah nimin khan sawrkar laipui ruahmanna angin State pahnih Chief Secretary te chuan New Delhi-ah inbiakna an nei a. He inbiakna ah hian inremna nei thei lovin State Sawrkar thuneitu sang zawkte rawn ve ve in, hmalak zel dan tur ngaihtuah ni se an ti.
Ni 2 chhungin Serchhip District-ah hri kai mi 17 zet hmuhchhuah niin Serchhip District-a hri kai hmuhchhuah chu 741 an tling tawh.
Nimin khan Serchhip District-ah ASF vangin Vawk 52 zet thi lehin ASF vanga Serchhip District-a Vawk thi chu 1104 a tling tawh.
Academic Session thar-a zirlai naupangte hnena a thlawna zirlaibu sem tur chu karleh lam khian semchhuah theih beisei a ni.
Serchhip District Consumer Association leh Serchhip-a Legal Metrology Department te chuan nimin khan Thenzawl-a Supply Kudam chu sawilawk awm lova enfiahin bukna an hman te an enfiah a, an buhfai buk chu a dik hle tih an sawi.
