ADC-a mipui thlan sawrkar tibuai thin ah MNF puh

Congress Legislature Party (CLP) Leader leh MPCC Treasurer Zodintluanga Ralte MLA chuan MNF chuan Autonomous District Council (ADC)-ah mipui thlan sawrkar tir lovin an tibuai thin niin a sawi.

Mara District Congress Committee huaihawta Siaha khawpui chhung hmun hrang hranga Street Campaign nimin-a neih ah CLP Leader leh MPCC Treasurer Zodintluanga chuan MNF sawrkar lai khan Autonomous District Council (ADC)-ah sawrkar nghet a ding ngai lo nia sawiin, “Mipui thlan sawrkar tir lovin an tibuai thin a ni. Kum 2008-ah Mizoram-ah Congress sawrkar a ding a, kum 10 chhungin ADC-ah sawrkar nghet tak a ding. Kum 2018-ah MNF sawrkar a lo ding a, Mara ADC-ah hlauhthawnna lo thlengin BJP-ah an lut ringawt mai a, Chakma ADC-ah CEM pali panga an awm tawh, Lai ADC-ah hlet a chhuaha BJP-ah an kal ringawt mai a ni,” a ti bawk.

Kuhva sumdawnna chungchang sawiin Zodintluanga Ralte chuan, “Burma kuhva sumdawnna chungchangah MNF sawrkar hi a ngawi tlat a, hmanni lawkah Assam Chief Minister leh kan Chief Minister New Delhi-ah chaw an ei khawm a, 'High Level Meeting' ah chuan Chief Secretary leh Home Secretary-te nen an tel thin a. Kan CM te inhmuh-khawmna ah chuan a ruka kuhva tawlhtu lian nia hriat lar Abu Mazumdar a tel thung,” a ti a. Abu Mazumdar sawm chungchangah hian MNF Party chu in sawifiah an tumna lamah an sawifiah ta mah mah nia sawiin, “Abu Mazumdar chu New Delhi Mizoram House lamah thlen a tum thute an tarlang ta hial mai. Assam CM nge, Mizoram CM-in chaw ei-ah sawm zawk tihte pawh inpuhtawn a ni ta mek. Amaherawhchu, thil chiang tak mai chu, he Abu Mazumdar hi Congress sawrkar laia lo lang ngai lo, MNF sawrkar veleha buhfai rawn supply-tu lian ber a ni tih hi a ni,” tiin Abu Mazumdar chuan Mizoram-ah MNF Ministry pian atangin buhfai 'supply' hna nasa taka a thawh thu pholan a nih mek thu a sawi bawk.

MNF sawrkar an nin zia chu sawrkar hnathawk leh sumdawng ten tun dinhmunah an sawi tam ber a ni leh tawh tih pawh Zodintluanga chuan sawiin, “Financial Management-ah hian an hlawhchham let der a ni. CM sawi tam ber Rua/Mau an chinna hmun kan zuk en a, a chingtute an beidawng a, Kuhva ten an lo thlak leh hman tawh a ni. Sum siam nan ringawta Rua/Mau hman hi a beidawnthlak hle. Engatinge SEDP programme-ah CM atchilh bur Mau/Rua chin hi an telh loh? Tuna SEDP an sem tur pawh hi khawia sum nge tih an la sawi lo. Lo vah zawh vek a ni tawh a, thlai chin a hun mai dawn. Chutih laiin an sem tur pawh an la thlang mumal thei lo. Inthlan dawn apianga mipui bum nan SEDP hi an hmang mai mai a ni,” a ti bawk.