Niminpiah khan Mizoram-ah Sample 5801 enfiah leh niin hri kai mi 520 zet hmuhchhuah an ni leh a, Mizoram-a COVID-19 hri kai hmuhchhuah chu 21,854 tling tawhin hri kai hmuhchhuah zat ala tlahniam thei tak tak rihlo a ni.
MHIP General Hqrs. President, Lalthlamuani chuan MHIP Member te chu midang te tanpuina kawngah ke pen zel turin a chah.
Chakma Autonomous District Council (CADC)-a MNF kaihhruai sawrkar dinglai chuan harsatna a tawk leh dawn niin a lang a, CEM nilai Durja Dhan Chakma chu CEM a nihna atanga bang turin MDC 9 ten an ngen.
Mizo Zirlai Pawl (MZP) chuan Assam leh Mizoram Chief Secretary ten tun thla ni 9-a inbiakna an neih tur chu Mizoram chhung atanga Assam Police te an inhnuhdawh hma loh chuan thulh rih nise an duh thu an sawi.
Joint Action Committee on Inner Line Reserved Forest Demand leh Mizoram-a Political Party leh NGO te chuan Mizoram leh Assam ramri hnaihah Police tam zawk awmna tur hmunpui a rang thei ang bera siam turin Mizo-ram sawrkar an phut thu an sawi.
African Swine Fever (ASF) avanga Serchhip District-a Vawk thi chu sang khat aiin a tam ta.
Serchhip District-a COVID-19 hri kai hmuh-chhuah chu mi 722 an tling tawh.
COVID-19 hri leng avanga thla hmasa lam ah P&E Department lamin mipuite Electric hman zat enna, Meter Reading an kalpui theihloh avangin tun thla-a Electric Bill siamna atan thla thum kalta chhunga Electric bill chawhrual chu hman a ni.
Nimin July 6, 2021 kha Mizo Hmeichhe Insuihkhawm Pawl (MHIP) dinchampha, MHIP Day vawi 47-na niin hri leng avanga a huho-a hman a remchan loh avangin Serchhip-a MHIP Branch hrang hrangte chuan an remchan angin he ni pual hian hun an hmang a ni.