Kum 10 kalta ah 2021-ah kangmei tam ber

Nikum 2021 kha tunhnai kum 10 (2012-2021) kalta chhunga Mizoram a kangmei chhuah nasat ber kum a ni a. Nikum chhunga Mizoram-a In kang zinga zaa 67.10 leh ram kang zinga zaa 93.46 te chu February leh April thla chhunga thleng a ni.

Fire & Emergency Department chhinchhiah danin, nikum 2021 (January - December) chhung khan Mizoram-ah In kang (House fire) 76 awmin, ram kang (Forest fire) 199 a awm a, In kang-ah te hian Rs. 27,74,83,507/- hu bungraw kang chhia (value of property damage) a awm a ni. Kangmei chhuak vanga inhliam mi 3 awmin, Fire Service attend lohnaah ni 25.2.2021 tlai dar 3:30 khan Zamawia (87), Kepran khua chu YMA Park bula kangmei chhuak ah a kang thelhnaah a boral bawk a ni.

Nikum chhung khan February - April chu kangmei chhuah tam hunlai niin, heng thla 3 chhung hian In kang 51 awmin, hei hi nikum chhung a In kang awm zat 76 atangin zaa 67.10 a tling a, February - April chhung veka ram kang 186 thleng pawh nikum chhunga ram kang 199 atangin zaa 93.46 a tling bawk a ni. Nikum chhung khan In kang avangin January-ah Rs. 63,800/- hu bungraw kang chhia awmin, February-ah Rs. 91,44,300/- hu bungraw kang chhia a awm a. March thla chu kangmei chhuah nasat ber thla niin In kang 22 leh ram kang 106 thlengin, hemi thla a bungraw kangchhia hlut zawng chu Rs. 16,94,12,500/- a tling a ni. April thla ah Rs. 1,71,32,250/-, May-ah Rs. 15,11,000/-, June-ah Rs. 2,74,94,807/-, July-ah Rs. 13,12,500/-, August-ah Rs. 12,00,000/-, September-ah Rs. 30,68,350/-, October-ah Rs. 23,000/-, November-ah Rs. 82,00,000/- leh December-ah Rs. 3,89,21,000 hu bungraw kangchhia a awm bawk.