NABARD sum hmanga zirna In thawmthat hna thawh MZP in enzui zel an tum thu an sawi

MZP General Hqrs. chuan NABARD sum hmanga zirna In sak tha lo te chu a rang thei anga siamtha tur leh siamthat a nih hnuah chauh Bill pe tura Education Minister an ngen tawh ang leh Minister pawhin siamthat an tum thu a sawi tawh angin heng zirna In thuamthat te hi enzui zel an tum thu an sawi.

Nimin-a Aizawl Press Club-a thuthar thehdarhtute an kawmna ah MZP General Hqrs. hruaitute chuan Mizoram sawrkar chuan NABARD sum cheng nuai 3,500 a puk hmangin School thahnem tak chei that leh sak that hna Mizoram chhung hmun hrang hrangah a thawk mek tih an sawi a, he thil hi Mizoram leh a bik takin zirna (education) tihhmasawn kawnga Mizoram sawrkar hmalakna ropui tak a nih avangin an lawm thu leh chutihrual chuan he thil hi a nih dan tur ni phak silovin, tuten emaw hlawkna nasa tak an neihna hmanrua mai a ni ang tih an hlauin, a nih dan tur ang a ni pha lo ang tih an hlauh avangin MZP chuan theih ang angin a enzui bakah an zirchiang tih an sawi a. Thil lawmawm tam tak awm ve bawk mah se a nih tur ang ni phak lo leh siam that ngai an hmu nual tih an sawi a ni.

School sak hna thawk tur hian Consultancy Firm pahnih- CB Engineering leh Allied Concern te thlan an ni tih MZP chuan sawiin, CB Engineering hian Re-construction cheng nuai 2,500 changin Allied Concern hian Reparing cheng nuai 1,000 an chang tih an sawi a, Reconstruction-ah hian School 65 leh Repairing-ah hian School 107 awmin, a vaiin sikul 172 te thuamthatna tur a ni tih an sawi a. Heng hnathawh te hi a theih chin chin a hmunah an tlawh thu sawiin, “School 25 tlawh niin, MZP Hqrs., Sub-Hqrs. leh Branch-te hnen atangin School 24 report dawn a ni a. Phone hmangin School 50 vel zawhfiah a ni bawk,” tiin an thil hmuh dan te an tarlang a ni.

MZP hruaiturte chuan an endikna atangin hna tha leh lungawithlak engemaw zat hmuh a nih thu leh a project bakah School mamawh khawih tel a awm bakah a project ang ni lo mah se School lam hotute leh khawtlang hruaitute nen sawihoa School mamawh sak nana siamrem pawh a awm thu sawiin, a tlangpui thu in a nihna tur ang taka kalpui hi a tlem hle niin an sawi a. “Drawing leh a sanction amount nena enmil phei chuan a lungawi thlak loh hle,” tiin “Repairing bikah repair tur hi detail taka inziak a awm lova. Contractor-in ama duh dan leh tha a tih ang angin a repair mai niin a lang. Sikul thuneitute nena inrawn a, project ang ni lo, an ngaimawh zawng siamthat sak pawh a awm. A chung thlak tura tih (Roofing) ni mahse, rawng hnawih thar tawp hi a tam em em a,” an ti.

Sikul repairing tam zawk chu a langsar thei ang ber tura a chung leh bang rawng hnawih thar a ni tlangpui tih pawh sawiin MZP hruaitute chuan, “Labour Cess, GST leh Cut tur neuh neuh cut ngaite cut hnuah pawh, Estimate Amount atanga a lan danin 20% pawh hman lohna tur sulhnu a awm nual a ni,” an ti a. Hna hi an inhlanchhawng nasa em em niin a hriat tih pawh sawiin, anih tur ang ni lo mai ni lovin, a hna hrim hrim thawh mumal loh leh chhe tak tak hmuh tur a awm nual tih pawh an sawi bawk.

School repairing atana pawisa kal thenkhat chu a daih lo anga sawiin, School Fund thawh belha sak chhunzawm te pawh a awm tih MZP chuan sawiin, hna zawh mumal loh, laklawh deuha kalsan te pawh hmuh a ni tih an sawi bawk.

MZP chuan he thil hi nikum lam atanga an lo buaipui tawh thu pawh sawiin, an la thutak in an ngaimawh takzet tih an sawi a, hemi chungchang hi niminpiah ah Education Minister leh Official te nen pawh an sawiho tawh thu sawiin, an zirchianna atang an hriat tlangpui te hi siamthat a nih ngei an duh thu leh enzui zel pawh an tum thu an sawi a ni.