Khua leh Veng 34 te Red Zone-ah puan leh an ni

Serchhip District chhunga hri kai hmuh-chhuah tamna Veng leh khua 34 te chu February 15, 2022 atanga February 22, 2022 thleng atan Red Zone-ah puan an ni ve leh ta a, hemi atan hian nimin, Feb. 15, 2022 khan thupek tihchhuah a ni. 

Hemi chungchanga nimin-a Serchhip District Bawrhsap leh District Disaster Management Authority-a Chairman Nazuk Kumar-i’n thupek a tihchhuah ah kar khat chhung (Feb. 8 - 14, 2022) chhunga hri darh dan Rapid Response Team in an zirchianna ah Zone Classification siam tura rawtna an siam angin heng Veng leh khua 34 te hi February 15, 2022 atanga February 22, 2022 thleng Red Zone-ah a puan thu a tarlang a ni.

Nimin-a Red Zone-a puan thar tak te hi Serchhip Town chhungah AOC Veng, Bazar Veng, Bukpui, Chanmari Veng, Chhiahtlang Chhim Veng, Field Veng, Hmar Veng, New Serchhip Luiralmawi, New Serchhip Bazar Veng, New Serchhip Venglai, Saron Veng, Tuikhuah Veng leh Vengchung te an ni a. Town Area pawnlam ah Chhingchhip Venghlun, Chhingchhip Venglai, Khawlailung Bazar Veng, Khawlailung Bung-hmun, Khawlailung Dinthar, Khawlailung Veng-hlun, Lungchhuan, North Vanlaiphai Damdawi Veng, North Vanlaiphai Rawlkhang, Neihloh, Piler, Thentlang leh Zote South bakah Thenzawl khawchhung atangin Bazar, Dinthar, Electric Veng, Ramthar, Vachadil, Venglai leh Zote Veng te an ni.

Red Zone-a puan ah te hian hri leng a darh zel loh nan leh mipuite an lo him zawk nan kaihhruaina siam niin mipui punkhawmna lam chi Programme buatsaih khap niin infiamna leh ennawm hmun te chu khar tur a ni a, Bazar hmun te khar tur niin Bazar area pawnlam a dawr te erawh CAB tha taka zawm chungin nitin hawn phal a ni a, hnathawktu ten an awmchilhna hmun ah chuan CAB zawm chungin hnathawh phal a ni bawk.