Mizoram Pradesh Congress Committee (MPCC) chuan Mizoram-a MLA nilai mi 4 te chuan Office of Profit dan an palzut nia an hriat thu sawiin, hei vang hian Article 192 (1) tlawhchhanin heng MLA 4 te chungah hian Dan anga action la turin Mizoram Governor chu an ngen.
Mizoram sawrkar in SEDP hnuaia a din, Veterinary, Fishery & Sericulture Board chu nimin khan AH&Vety Minister, Dr. K. Beichhua hova thukhawmin SEDP hnuaiah AH&Vety Department hnuaia tanpuina dawng turte tlangzarhna hun chu November 25, 2020 khian hman nise an ti.
Penticostal Youth Department (PYD) Serchhip Biak Inpui te chuan nimin khan Serchhip Blood Bank-a dah turin thisen Unit 10 an pe.
Serchhip-IV Village Council te chuan nimin khan Faina hnatlang neiin an huamchhunga thenfai hna an thawk.
Niminpiah khan Serchhip District-ah Sample 30 enfiah niin COVID-19 hri kai hmuhchhuah thar an awm lo a, Serchhip District-ah hri kai enkawllai mi 8 an la awm mek.
Sawrkar atanga sum hmuh cheng nuai 7 leh Society sum hmanga sak Keitum-a Farming Co-operative Society Ltd. building chu nimin khan Asst. Registrar of Cooperative Societies (ARCS), Serchhip District, K. Lalduhawma chuan a hawng.
Nimin khan Serchhip-ah DAY-NULM hnuaia Serchhip District Executive Committee on Shelter for Urban Homeless chu thukhawmin sawrkar kum kal meka hmalakna tura rawtna awm te State Executive Committee pawmpui tura thlen nise an ti.
Niminpiah-a Mizoram-a Sample enfiah atangin COVID-19 hri kai mi 48 zet hmuhchhuah leh an ni a, an zinga a tam zawk hi Aizawl khawpui chhunga hri kai hmuhchhuah te an ni.
Health Minister, Dr. R. Lalthangliana chuan nimin khan MJA General Hqrs. hruaitute a Pisa-ah kawmin COVID-19 leng laka invenna atana sawrkar hmalakna hrang hrangah Print leh Electronic Media te hmalakna ah lawmthu a hrilh.
Mizoram Lok Sabha MP, C. Lalrosanga chuan Myanmar atanga sumdawnna bungrua lakluh Dan hnuaiah mipui tana harsatna siam tamlo zawnga hma la turin Customs hotute a chah.