Health Care Scheme-ah inrawnkhawmna neih a ni

Mizoram State Health Care Scheme (MSHCS) chungchanga inrawnkhawmna chu nimin khan Health Minister Dr. R. Lalthangliana hovin Aizawl-a SAD Conference Hall-ah neih a ni.

He thutkhawm ah hian Health & Family Welfare Board Vice Chairman Dr. ZR. Thiamsanga bakah Health Secretary mawhphurhna la mektu Dr. Lalzirmawia Chhangte, Health Department Principal Director Dr. F. Lallianhlira te, YMA, MUP, MHIP, FMGE&W, ACLCA, NGHAM, All Mizoram VC Association, CADC, LADC, MADC aiawhte an tel a, Finance Department leh MSHCS hotute an tel bawk a ni.

He inrawnkhawmna ah hian tun aia MSHCS hnuaia inziaklut an tam zawk theih dan tur ngaihtuah niin, mipuiten tun aia an ngaihpawimawh a, an inziahluh tam chu a pawimawh tih sawi niin, rawtna hrang hrang ngaihthlak a ni a. Tlawmngai Pawl hrang hrangte chuan MSHCS pawimawhna mipuite zirtirna kawnga sawrkarin ruahmanna a siam ang angte theihtawp chhuaha thlawpa lo bawhzui an inhnuam thu an sawi a, District Council aiawhte pawhin an huam chhungah ngawrh taka awareness campaign neih an mamawh thu an sawi a ni.

Mizorama sawrkar hnuaia hnathawk nghette Medical Reimbursement nen chhunfin chungchangte pawh he hunah hian sawi rik a ni a, uluk leh zau zawka la sawiho tha tih niin, MSHCS hnuaia inziahluh dawna rei tak tak intlar ngai lova ruahmanna siam a tul thu pawh tarlan a nih bakah, Online Registration tih theih dan kawng zawn a tul thu te tarlan a ni.

He hunah hian MSHCS hotute chuan sawrkar hnathawk nghette chhiar tel lovin Mizorama chhungkaw awm zat atanga 40% vel MSHCS hnuaiah an inziaklut nia an hriat thu an sawi a, Health Care Bill tang pawh nikum February thla chin chu an pe zo thawkhat tawh tih sawiin, COVID-19 vanga sum harsatna awmin nasa taka a nghawng thu an sawi a ni.