ZPM in Electric Bill tihsan tumna complaint thehlut

ZPM Party chuan Mizoram sawrkar Power & Electricity-in Electric Bill 21.05% a tisang tura JERC a rawtna a thlen chungchangah nimin khan complaint an thehlût.

ZPM aiawha complaint thehluttu an Party Secretary General PC. Vanlalruata chuan kan Sawrkar hrawn mekin mipuite harsatna siam zawnga Electric Bill tisang tura ruahmanna a siam chu hriatthiam har a tih thu sawiin, “Nikum 2021 pawh khan P&E Department chuan 41.92%-a sângin Tariff tihpun a lo rawt tawh a, khami tum pawh khan ZPM chuan na taka sawiselin tihniam tûrin theihtawp a lo chhuah tawh a, Government Subsidy nen tang-rual in 20.70% a tih tlak a lo ni tawh a ni,” a ti.

Hetianga kum khat pawh a ralhmaa a ngai ang bawka Bill tisang tura sawrkarin hma a la leh nghal mai chu ZPM chuan an dem takzet tih sawiin, “Hripui avangin mipui an rum a, eizawnna nasa takin a khaihlak bâkah sum leh pai ah mipuiten harsatna nasa tak an tawh mek lai hian Sawrkar chu mipuite harsatna sukiang zâwk tûr an nih lai a harsatna siam zawnga hma a la tlat mai hi ZPM chuan hriatthiam har a ti hle a ni,” a ti bawk.

ZPM Party chuan Power siamchhuah kawngah kan sawrkarin hmalakna a nei lo nia sawiin, “Power leina Station 4-ah rate sang bika a lei hi a tlawm zawka lei dan ngaihtuah sela, Power leina Rs. 7.36 per unit a nih laiin kan hralh ve hian Rs. 3.47 per unit a ni thung a. Chuvângin trading chungchang hi zirchian ni bawk se la. Electricity Act 2003 in a sawi angin Generalisation, Transmission leh Distribution thliar fel hmasak ni se,” tiin cheng nuai thum sem tura intiam sawrkar chu Tariff tihsan aiin subsidy siam tûra an phut thu an sawi bawk. He hunah hian PC. Vanlalruata hi an Party hruaitu thenkhat ten an tawiawm bawk a ni.